రాయలసీమలో సీఎం చంద్రబాబు 5 రోజుల పర్యటన: పెన్షన్లు, హీరో మోటార్స్, కడప స్టీల్ ప్లాంట్ శంకుస్థాపన

ముఖ్యమంత్రి చంద్రబాబు నాయుడు జూలై 1 నుంచి 5 వరకు రాయలసీమ జిల్లాల్లో పర్యటించనున్నారు. సంక్షేమ పథకాలు, పారిశ్రామిక అభివృద్ధి కార్యక్రమాలపై దృష్టి పెట్టి ఈ పర్యటన చేపట్టనున్నారు.

మొదటి రోజు నెల్లూరు జిల్లా చిల్లకూరు గ్రామంలో ఎన్టీఆర్ భరోసా పింఛన్లను లబ్ధిదారులకు అందజేస్తారు. రాష్ట్రవ్యాప్తంగా ప్రతి నెలా 62 లక్షల మందికి వివిధ పింఛన్లు ఇస్తున్నారు. వృద్ధాప్యం, వితంతు తదితర పింఛన్ల కోసం ప్రభుత్వం సంవత్సరానికి దాదాపు 27,750 కోట్లు ఖర్చు చేస్తోంది.

అదే రోజు తిరుపతి జిల్లా శ్రీ సిటీలో హీరో మోటార్స్ కంపెనీ నూతన ప్లాంట్ శంకుస్థాపన జరుగనుంది. 750 కోట్ల రూపాయల పెట్టుబడితో ఈ ప్లాంట్ నిర్మించనున్నారు. దీనివల్ల ప్రత్యక్షంగా, పరోక్షంగా 4 వేల మందికి ఉద్యోగాలు లభిస్తాయి. ఏడాదికి 15 లక్షల ద్విచక్ర వాహనాలు ఉత్పత్తి చేస్తారు. ఈ కంపెనీ పి4 (పబ్లిక్ ప్రైవేట్ పీపుల్ పార్టనర్‌షిప్) కార్యక్రమంలో భాగంగా విద్యార్థులకు స్కాలర్‌షిప్‌లు కూడా అందిస్తుంది.

రెండవ రోజు రైల్వే కోడూరు నియోజకవర్గంలో కేంద్ర ప్రభుత్వ ఉపాధి హామీ పథకం (MGNREGA) కార్యక్రమంలో పాల్గొంటారు. ఈ కార్యక్రమానికి ఉపముఖ్యమంత్రి పవన్ కళ్యాణ్, కేంద్ర మంత్రి కూడా హాజరవుతారు. అనంతరం తిరుపతిలో జరిగే GSDP వర్క్‌షాప్‌లో పాల్గొంటారు. ఈ సమావేశంలో నీతి ఆయోగ ప్రతినిధులు ఉంటారు.

మూడో రోజు కడప జిల్లా జమ్మలమడుగు నియోజకవర్గంలో కడప స్టీల్ ప్లాంట్ (రాయలసీమ స్టీల్ ప్లాంట్) శంకుస్థాపన చేస్తారు. గతంలో 2018లో టీడీపీ ప్రభుత్వం, ఆపై YSRCP ప్రభుత్వం కూడా శంకుస్థాపనలు చేసినా నిర్మాణం జరగలేదు. ఈసారి నీరు, విద్యుత్ వంటి సౌకర్యాలు కల్పించి ప్రాజెక్టును ముందుకు తీసుకెళ్తామని ప్రభుత్వం చెప్తోంది.

నాలుగు, ఐదు తేదీల్లో ముఖ్యమంత్రి తన సొంత నియోజకవర్గం కుప్పంలో పర్యటిస్తారు. స్థానిక ప్రజలతో, కార్యకర్తలతో మమేకమై అభివృద్ధి కార్యక్రమాలను ప్రారంభిస్తారు. నియోజకవర్గంలో చేపట్టిన పనుల శంకుస్థాపనలు, ప్రారంభోత్సవాలు నిర్వహిస్తారు.