చిల్లకూరులో నేడు సీఎం చంద్రబాబు పర్యటన; ఎన్టీఆర్ భరోసా పెన్షన్ల పంపిణీ

ఏపీ ముఖ్యమంత్రి చంద్రబాబు నాయుడు నేడు (జులై 1) నెల్లూరు జిల్లా చిల్లకూరు మండలం పున్నపువారిపాలెంలో పర్యటించనున్నారు. ఎన్టీఆర్ భరోసా పెన్షన్ల పంపిణీ కార్యక్రమంలో పాల్గొనడం ఈ పర్యటన ముఖ్య ఉద్దేశం.

సీఎం ఉదయం 10 గంటలకు ఉండవల్లి నుంచి హెలికాప్టర్‌లో బయలుదేరి 11 గంటలకు పున్నపువారిపాలెంలోని హెలిపాడ్‌కు చేరుకుంటారు. అనంతరం స్థానిక నేతలు, అధికారులతో 20 నిమిషాలు సమావేశమవుతారు. ఉదయం 11:25 గంటలకు ప్రజావేదికపైకి చేరుకుని కార్యక్రమంలో పాల్గొంటారు. ఈ సందర్భంగా జిల్లా కలెక్టర్, ఎమ్మెల్యే, పెన్షన్ లబ్ధిదారులు ప్రసంగించే అవకాశం ఉంది. మధ్యాహ్నం 12:20 నుంచి 1:50 వరకు సీఎం ప్రసంగిస్తారు.

లంచ్ తర్వాత సీఎం ఒక లబ్ధిదారుని ఇంటికి వెళ్లి వారితో మాట్లాడతారు. ఆ తర్వాత స్థానిక టీడీపీ క్యాడర్‌తో సమావేశమై పార్టీ బలోపేతం, అభివృద్ధి కార్యక్రమాలు, ప్రభుత్వ విధానాలపై చర్చించనున్నారు. ఈ సమావేశంలో ప్రతిపక్ష ఆరోపణలపై కూడా స్పందించే అవకాశం ఉందని భావిస్తున్నారు.

సభకు సుమారు 3,000 నుంచి 5,000 మంది హాజరవుతారని అంచనా. జిల్లా కలెక్టర్ హిమాంశు శుక్లా, ఎస్పీ అజిత వాజన్లు భద్రతా ఏర్పాట్లను పర్యవేక్షిస్తున్నారు. అన్ని ఏర్పాట్లు పూర్తయినట్లు అధికారులు తెలిపారు.

గత రెండేళ్లలో సీఎం నెల్లూరు జిల్లాకు ఇది ఐదోసారి పర్యటించడం గమనార్హం. ఇంతకుముందు ఆత్మకూరు, సోమశిల, వింజమూరు, కావలి ప్రాంతాల్లో పర్యటించారు. నేటి పర్యటనలో ఆయన ప్రభుత్వ పథకాలు, అభివృద్ధి పనుల గురించి వివరించనున్నారు.