సీఎం చంద్రబాబు: టెక్నాలజీ, ఆధ్యాత్మికత రెండూ అవసరం; ఏపీని ఆధ్యాత్మిక కేంద్రంగా చేస్తా

ఆంధ్రప్రదేశ్ ముఖ్యమంత్రి చంద్రబాబు నాయుడు టెక్నాలజీ, ఆధ్యాత్మికత రెండూ అవసరమని అభిప్రాయపడ్డారు. బాబా రామ్‌దేవ్‌తో ఒక కార్యక్రమంలో మాట్లాడిన ఆయన, గత మూడు దశాబ్దాలుగా తాను టెక్నాలజీని ప్రమోట్ చేస్తే, రామ్‌దేవ్ యోగా, ఆధ్యాత్మికతను ప్రమోట్ చేశారని తెలిపారు. టెక్నాలజీ లేకుండా ఆధ్యాత్మికత పూర్తికాదని, ఈ రెండూ కలిసి ఉండాలని చెప్పారు.

అంతర్జాతీయ యోగా దినోత్సవం ఏర్పాటుకు ప్రధాని నరేంద్ర మోడీ చేసిన కృషిని సీఎం చంద్రబాబు ప్రశంసించారు. యోగాను ఐక్యరాజ్యసమితిలో ప్రవేశపెట్టి, 177 దేశాలు అనుసరించేలా చేయడం గొప్ప విషయమని అన్నారు. రేపు 190 దేశాలు యోగా దినోత్సవంలో పాల్గొంటాయని ఆయన గుర్తుచేశారు. ప్రపంచం ప్రస్తుతం భౌగోళిక రాజకీయ ఉద్రిక్తతలు, కుటుంబ విలువల క్షీణత ఎదుర్కొంటోందని, ఆధ్యాత్మికత ద్వారా మనసు, శరీరం నియంత్రించుకోవచ్చని పేర్కొన్నారు.

చంద్రబాబు నాయుడు ఆంధ్రప్రదేశ్‌ను ఆధ్యాత్మిక కేంద్రంగా మార్చాలనే లక్ష్యాన్ని వెల్లడించారు. రాష్ట్రంలో ప్రస్తుతం 31.5% ఉన్న పచ్చదనాన్ని 50%కు పెంచాలని, సహజ వ్యవసాయాన్ని విస్తరించాలని చెప్పారు. ఇప్పుడు 20 లక్షల ఎకరాల్లో 20 లక్షల మంది రైతులు సహజ వ్యవసాయం చేస్తున్నారని, రాబోయే 4-5 ఏళ్లలో దాన్ని 50 లక్షల ఎకరాలకు, 50 లక్షల మంది రైతులకు విస్తరించాలన్నారు. రసాయన ఎరువులు, పురుగుమందులు లేకుండా ప్రపంచానికి ఆహారం ఉత్పత్తి చేయాలన్నది తన లక్ష్యమని పేర్కొన్నారు.

రోజూ 30 నిమిషాల నుంచి ఒక గంట యోగా చేస్తే ఆరోగ్యంగా, సంతోషంగా ఉండొచ్చని చంద్రబాబు సూచించారు. డబ్బు వల్ల భౌతిక సుఖం మాత్రమే లభిస్తుందని, పూర్తి ఆనందం రాదని అన్నారు.