రామ్‌దేవ్ బాబాతో సీఎం చంద్రబాబు యోగా; ఆధ్యాత్మిక కేంద్రం, 50% పచ్చదనం డిమాండ్

ఆంధ్రప్రదేశ్ ముఖ్యమంత్రి చంద్రబాబు నాయుడు రామ్‌దేవ్ బాబాతో కలిసి యోగా సాధన చేశారు. ఈ సందర్భంగా ఆయన రాష్ట్రం కోసం మూడు కీలక విజ్ఞప్తులు చేశారు.

రాష్ట్రాన్ని ఆధ్యాత్మిక టూరిజం హబ్‌గా మార్చాలని, ప్రస్తుతం 31.5 శాతంగా ఉన్న పచ్చదనాన్ని 50 శాతానికి పెంచాలని, సహజ వ్యవసాయాన్ని విస్తరించాలని సీఎం రామ్‌దేవ్ బాబాను కోరారు. ప్రస్తుతం 20 లక్షల మంది రైతులు సహజ వ్యవసాయం చేస్తుండగా, వచ్చే 4–5 ఏళ్లలో 50 లక్షల మంది రైతులకు విస్తరించాలని లక్ష్యంగా పెట్టుకున్నట్టు చెప్పారు.

ఎరువులు, పురుగుమందులు లేకుండా ఆహారం ఉత్పత్తి చేయడమే భవిష్యత్తని చంద్రబాబు పేర్కొన్నారు. ఆధ్యాత్మికతతో కూడిన వికసిత్ భారత్ నిర్మాణం ప్రధాని మోదీ ఆలోచన అని ఆయన ప్రస్తావించారు.

యోగా, ధ్యానం, ప్రాణాయామాన్ని దైనందిన జీవితంలో భాగం చేసుకోవాలని పౌరులకు విజ్ఞప్తి చేసిన సీఎం, తాను ప్రతిరోజూ యోగా సాధన చేస్తానని హామీ ఇచ్చారు. ఈ కార్యక్రమంలో రామ్‌దేవ్ బాబా యోగా ప్రాధాన్యతపై ప్రసంగించారు.