భద్రాద్రి కొత్తగూడంలో అటవీ శాఖ, గిరిజన మహిళల మధ్య ఘర్షణ

భద్రాద్రి కొత్తగూడం జిల్లాలోని మడుగురు అడవుల్లో అటవీ శాఖ అధికారులు, గిరిజన మహిళల మధ్య ఘర్షణ జరిగింది.

మనుబోతులపాడు అటవీ ప్రాంతంలో గతంలో స్వాధీనం చేసుకున్న 10 హెక్టార్ల భూమిలో మొక్కలు నాటేందుకు అధికారులు వెళ్లడంతో ఈ వివాదం తలెత్తింది. వలసగిరిజన మహిళలు తాము సాగు చేసుకుంటున్న భూమిని వదిలేది లేదని చెప్పి, పనుల కోసం తెచ్చిన JCB ముందు అడ్డంగా నిలబడి నిరసన తెలిపారు. అధికారులు వారిని తప్పించే ప్రయత్నంలో ఇరువర్గాల మధ్య తోపులాట జరిగింది.

అటవీ శాఖ ప్రకారం, తమ మహిళా బీట్ ఆఫీసర్లపై గిరిజనులు దాడి చేశారు. అయితే, అధికారులే తమపై చేయి చేసుకున్నారని గిరిజన మహిళలు ఆరోపిస్తున్నారు. కొంతమంది మహిళలకు స్వల్ప గాయాలయ్యాయి.

మడుగురు రేంజ్ ఆఫీసర్ ఉపేందర్ అశ్వాపురం పోలీస్ స్టేషన్లో ఫిర్యాదు చేశారు. గిరిజనులు కూడా ఫిర్యాదు చేసేందుకు సిద్ధమయ్యారు. పోలీసులు ఇరువర్గాల నుంచి వివరాలు సేకరిస్తున్నారు, విచారణ అనంతరం చట్ట ప్రకారం చర్య తీసుకుంటామని తెలిపారు.