CM రేవంత్: ఇందిరమ్మ ఇళ్లను జనావాసాల పరిధిలోనే నిర్మించాలి

హైదరాబాద్ లోని కోర్ అర్బన్ రీజియన్ ఎకానమీ (CURE) పరిధిలో నిర్మించనున్న ఇందిరమ్మ ఇళ్ల పథకంపై ముఖ్యమంత్రి రేవంత్ రెడ్డి సమీక్ష నిర్వహించారు. ఉన్నతాధికారులతో జరిగిన సమావేశంలో ఆయన కొన్ని ముఖ్యమైన సూచనలు చేశారు.

ఇందిరమ్మ ఇళ్లను జనావాసాలకు దూరంగా కాకుండా, జనసాంద్రత ఉన్న ప్రాంతాల్లోనే నిర్మించాలని సీఎం స్పష్టం చేశారు. ఔటర్ రింగ్ రోడ్ (ORR) లోపల నిరుపయోగంగా ఉన్న స్థలాలను గుర్తించాలని ఆదేశించారు. పోలీసు, రెవెన్యూ, రవాణా శాఖలకు చెందిన భూములను స్వాధీనం చేసుకుని, ఆయా శాఖలకు ప్రత్యామ్నాయ స్థలాలు కేటాయించాలని సూచించారు. ఇప్పటికే పలు నియోజకవర్గాల్లో స్థలాలను గుర్తించినట్లు అధికారులు సీఎంకు తెలిపారు.

తొలి దశలో హైదరాబాద్ లోని 17 నియోజకవర్గాల్లో 7,680 ఫ్లాట్లు నిర్మించే ప్రణాళికను ప్రభుత్వం రూపొందిస్తోంది. ఒక్కో ఫ్లాట్ విస్తీర్ణం 528 చదరపు అడుగులు, కార్పెట్ ఏరియా 400 చదరపు అడుగులుగా నిర్ణయించారు. ఒక్కో ఇంటి నిర్మాణ వ్యయం సుమారు ₹11 లక్షలు కాగా, ప్రభుత్వం ₹5 లక్షల సబ్సిడీ అందించనుంది. మిగిలిన ₹6 లక్షలు లబ్ధిదారుడి వాటా. స్థలాల గుర్తింపు ప్రక్రియను వేగవంతం చేయాలని సీఎం అధికారులను ఆదేశించారు.