కొడంగల్‌లో సీఎం రేవంత్ రెడ్డి పర్యటన: ₹9,053 కోట్ల అభివృద్ధి పనులకు శంకుస్థాపన

ముఖ్యమంత్రి రేవంత్ రెడ్డి మూడు రోజుల పర్యటనలో భాగంగా కొడంగల్ చేరుకున్నారు. తన నియోజకవర్గంలో ₹9,053.48 కోట్ల అంచనా వ్యయంతో 13 అభివృద్ధి పనులకు శంకుస్థాపన, ప్రారంభోత్సవం చేయనున్నారు.

మొదటి రోజు హకీంపేటలో రైతు మేళా ఇండస్ట్రియల్ ఎక్స్‌పోను ప్రారంభిస్తారు. అనంతరం వ్యవసాయ, పారిశ్రామిక ఉత్పత్తుల స్టాల్లను సందర్శిస్తారు. ఆదర్శ రైతులు, వ్యవసాయ శాస్త్రవేత్తలతో వ్యవసాయంలో ఆధునిక పద్ధతులు, రైతుల సమస్యలపై చర్చిస్తారు. పారిశ్రామిక వేత్తలతో సమావేశమై పెట్టుబడులు, పరిశ్రమల ఏర్పాటుపై మాట్లాడతారు. రాత్రి కొడంగల్‌లోని తన నివాసంలో బస చేస్తారు.

రెండో రోజు హకీంపేటలో స్వయం సహాయక సంఘాల మహిళలతో సమావేశమవుతారు. లగచెర్ల ఇండస్ట్రియల్ కారిడార్‌లో ₹81 కోట్ల అంచనా వ్యయంతో రాబోయే ఎకో పామ్ ఆయిల్ ఫ్యాక్టరీకి శంకుస్థాపన చేస్తారు. ₹46.8 కోట్లతో నిర్మాణం పూర్తయిన 10 ప్రభుత్వ భవనాలను ప్రారంభిస్తారు.

హకీంపేటలో NATCO సంస్థ CSR నిధులతో నిర్మించిన పాఠశాల, జూనియర్ కళాశాల భవనాలు, ప్రాథమిక ఆరోగ్య కేంద్రాన్ని ప్రారంభిస్తారు. బోమ్రాస్‌పేట, కొడంగల్, దుద్యాలలో కొత్త పోలీస్ స్టేషన్లు, దుద్యాల సమన్వయ మండల కార్యాలయ భవనం, కోస్గి సైన్స్ మ్యూజియం ప్రారంభోత్సవం జరుగుతుంది. దౌలతాబాద్ ప్రభుత్వ జూనియర్ కళాశాల, బాలంపేట ప్రాథమిక ఆరోగ్య కేంద్రం కూడా ప్రజలకు అందుబాటులోకి వస్తాయి.

మూడో రోజు హకీంపేటలో భారీ రైతు బహిరంగ సభ నిర్వహిస్తారు. ఈ సభకు 50 వేల మంది రైతులు హాజరవుతారని అధికారులు ఏర్పాట్లు చేస్తున్నారు. రంగారెడ్డి, వికారాబాద్, నారాయణపేట, సంగారెడ్డి, మెదక్, మహబూబ్‌నగర్, వనపర్తి, గద్వాల, నాగర్‌కర్నూల్, మేడ్చల్-మల్కాజిగిరి జిల్లాల నుంచి రైతులను తీసుకొస్తున్నారు. సాయంత్రం 4 గంటల నుంచి రాత్రి 7 గంటల వరకు సభ కొనసాగుతుంది. సభలో రైతులను ఉద్దేశించి ముఖ్యమంత్రి ప్రసంగిస్తారు.