తుంగభద్ర జలాలపై కేంద్రం జోక్యం కోరిన CM రేవంత్ రెడ్డి

తుంగభద్ర డ్యామ్ పునః ప్రారంభోత్సవం సందర్భంగా మూడు రాష్ట్రాల ముఖ్యమంత్రులు ఒకే వేదికపై కలవబోతున్నారు. తెలంగాణ, ఆంధ్రప్రదేశ్, కర్ణాటక సీఎంలు ఒకే చోట సమావేశం కావడం రాజకీయంగా ఆసక్తిగా మారింది. తెలంగాణ CM రేవంత్ రెడ్డి తుంగభద్ర జలాలపై అధికారులతో ఉన్నత స్థాయి సమీక్ష నిర్వహించారు. తెలంగాణకు హక్కుగా తుంగభద్ర నుంచి 15.99 TMC నీరు రావాల్సి ఉందని, ప్రస్తుతం కేవలం 5 నుంచి 6 TMC లకే పరిమితం అవుతోందని ఆందోళన వ్యక్తం చేశారు. RDS కింద 83,987 ఎకరాలకు నీరు అందాల్సి ఉందని రేవంత్ స్పష్టం చేశారు. తుంగభద్ర బోర్డును మరింత పటిష్టం చేయాలని కేంద్రానికి విజ్ఞప్తి చేశారు. 59 కోట్ల రూపాయలు డిపాజిట్ చేసినప్పటికీ RDS పనులు పూర్తి కాలేదని వాపోయారు. భాగస్వామ్య రాష్ట్రాలతో సమన్వయం ఏర్పడేలా కేంద్రం చర్యలు తీసుకోవాలని కోరారు. ప్రతిపక్ష BRS తరపున మాజీ మంత్రి హరీష్ రావ్ CM రేవంత్ రెడ్డికి లేఖ రాశారు. తెలంగాణ హక్కుల్ని తాకట్టు పెట్టొద్దని, కర్ణాటక అక్రమ ప్రాజెక్టులను అడ్డుకోవాలని డిమాండ్ చేశారు. పాలమూరు రైతుల భవిష్యత్తు ప్రమాదంలో పడకూడదని హరీష్ రావ్ హెచ్చరించారు. మూడు రాష్ట్రాల మధ్య నిర్మించిన రాజోలి బండ డైవర్షన్ స్కీమ్ మరమ్మతు విషయంలో కూడా రేవంత్ ప్రశ్నించే అవకాశం ఉందని ప్రభుత్వ వర్గాలు తెలిపాయి. కాలువల పూడిక తీత, ఇతర రాష్ట్రాల ఆక్రమణతో తెలంగాణ నష్టపోతోందని CM వేదికపై లేవనెత్తే అవకాశం ఉందని తెలుస్తోంది. ముగ్గురు సీఎంలను కలిసే ముందు జలసౌధలో కీలక సమావేశం నిర్వహించి రేవంత్ తన డిమాండ్ల జాబితాను సిద్ధం చేసుకున్నారు.