డీలిమిటేషన్ బిల్లు ప్రత్యేక సమావేశాలకు కేంద్రం సన్నాహాలు, వ్యతిరేకిస్తామన్న కాంగ్రెస్

కాంగ్రెస్ పార్టీ డీలిమిటేషన్ బిల్లును వ్యతిరేకిస్తుందని కాంగ్రెస్ ఎంపీ కె.సి. వేణుగోపాల్ స్పష్టం చేశారు. ఆగస్టు 16, 17, 18 తేదీల్లో ప్రత్యేక పార్లమెంట్ సమావేశాలు నిర్వహించాలని కేంద్రం యోచిస్తున్న నేపథ్యంలో ఆయన ఈ వ్యాఖ్యలు చేశారు.

డీలిమిటేషన్ బిల్లుతో పాటు మహిళా రిజర్వేషన్ బిల్లును కూడా ప్రత్యేక సమావేశాల్లో ప్రవేశపెట్టే అవకాశం ఉందని సమాచారం. ఈ బిల్లులకు సహకరించాలని విపక్షాలను కోరినట్లు కేంద్ర మంత్రి కిరణ్ రిజిజు తెలిపారు.

కాంగ్రెస్ నేత రాహుల్ గాంధీతో కేంద్ర మంత్రి కిరణ్ రిజిజు సమావేశమయ్యారు. ఈ సమావేశంలో డీలిమిటేషన్ బిల్లుపై చర్చించినట్లు తెలుస్తోంది. మిగతా విపక్షాలతో సంప్రదించిన తర్వాతే తమ నిర్ణయం వెల్లడిస్తామని రాహుల్ గాంధీ తెలిపినట్లు వర్గాలు చెబుతున్నాయి.

విపక్షాల వైఖరి చాలా స్పష్టంగా ఉందని, ఎటువంటి మార్పు లేదని వేణుగోపాల్ తెలిపారు. ప్రత్యేక పార్లమెంట్ సమావేశాల గురించి కేంద్రం లీకులు ఇస్తోందని ఆయన ఆగ్రహం వ్యక్తం చేశారు. పార్లమెంటరీ వ్యవహారాల మంత్రి అనధికారిక చర్చలు జరుగుతున్నాయని గందరగోళం సృష్టిస్తున్నారని విమర్శించారు.

ప్రస్తుత పార్లమెంట్ సమావేశాలు ముగిసిన తర్వాత సభను నిరవధికంగా వాయిదా వేయకపోవచ్చని అధికారిక వర్గాలు చెబుతున్నాయి. అవసరమైన సంఖ్యా బలం సమకూరిన తర్వాత ప్రత్యేక సమావేశాలు ఏర్పాటు చేసే అవకాశం ఉన్నట్లు తెలుస్తోంది.