ఖమ్మంలో బకాయి బిల్లులతో ప్రభుత్వ స్కూల్‌కు కాంట్రాక్టర్ తాళం

ఖమ్మం జిల్లా దానవాయిగూడెంలోని ఓ ప్రభుత్వ పాఠశాలకు కాంట్రాక్టర్ అయోధ్య తాళం వేశారు. మరమ్మతు పనుల కోసం రావాల్సిన రూ.11 లక్షల బిల్లులు చెల్లించలేదని ఆయన ఆరోపిస్తున్నారు.

‘మన ఊరు మన బడి’ పథకంలో భాగంగా ఈ పాఠశాలలో మరమ్మతులు చేశారు. అప్పటి బీఆర్ఎస్ ప్రభుత్వం రూ.10 లక్షలు మంజూరు చేసింది. ఆయన ఆ మొత్తం తీసుకున్నారు. మిగిలిన రూ.11 లక్షలు చెల్లించకపోవడంతో ఇబ్బందులు పడుతున్నట్లు తెలిపారు.

గత మూడేళ్లుగా అధికారుల చుట్టూ తిరిగి, మంత్రులకు విషయం చేరవేసినా స్పందన లేదని ఆయన వాపోయారు. ఈ నేపథ్యంలో శనివారం పాఠశాల మెయిన్ గేటుకు తాళం వేసి కుటుంబ సభ్యులతో కలిసి నిరసన చేపట్టారు.

సమాచారం అందుకున్న పోలీసులు, విద్యాశాఖ అధికారులు ఘటనా స్థలానికి చేరుకున్నారు. సమస్య పరిష్కరిస్తామని హామీ ఇవ్వడంతో అయోధ్య తాళం తెరిచారు. యథావిధిగా తరగతులు ప్రారంభమయ్యాయి.

తాను వడ్డీకి అప్పు చేసి పనులు చేశానని, బిల్లులు చెల్లించకపోతే ఆర్థికంగా చితికిపోతానని అయోధ్య వాపోయారు. అధికారులు సమస్యను జిల్లా ట్రెజరీ, డీఈఓ కార్యాలయంతో సంప్రదించి త్వరలో పరిష్కరిస్తామని చెప్పారు.