విశాఖకు మళ్లీ లగ్జరీ క్రూజ్: కార్డిలియో ఎంప్రెస్ సర్వీసులు పునఃప్రారంభం

ప్రపంచ సంఘర్షణల నేపథ్యంలో అంతర్జాతీయ పర్యాటకం కుంటుపడటంతో దేశీయ పర్యాటకానికి ఊతం లభిస్తోంది. ఆంధ్రప్రదేశ్‌లో బీచ్ టూరిజానికి ప్రాధాన్యత పెరిగింది. ఈ క్రమంలో చెన్నై-విశాఖ మధ్య లగ్జరీ క్రూజ్ సర్వీసులు నిర్వహించే కార్డిలియో ఎంప్రెస్ మళ్లీ సేవలు ప్రారంభించనుంది.

ఈ క్రూజ్ ఈ నెల 22న చెన్నైలో బయలుదేరి 24న విశాఖపట్నం ఆర్కే బీచ్‌కు చేరుకుంటుంది. ముందస్తు షెడ్యూల్ ప్రకారం జూలై 15 వరకు మొత్తం నాలుగు ట్రిప్పులు ఈ నౌక చేపడుతుంది. జూలై 20 వరకు దీని సేవలను పర్యాటకులు ఆస్వాదించవచ్చు.

ఏపీ ప్రభుత్వం ‘హాలిడే ఇన్ ఆంధ్రప్రదేశ్’ క్యాంపెయిన్ ప్రారంభించడం, అంతర్జాతీయ విమాన ప్రయాణాల ఖర్చు పెరగడం వంటి కారణాలతో దేశీయ పర్యాటకానికి డిమాండ్ పెరిగిందని ఏపీ టూర్స్ అండ్ ట్రావెల్స్ అసోసియేషన్ వర్గాలు తెలిపాయి. స్వదేశీ పర్యాటకులతో ఈ క్రూజ్‌కు క్రేజ్ ఏర్పడిందని, తెలుగు రాష్ట్రాలతో పాటు ఒడిశా, ఛత్తీస్‌గఢ్ నుంచి కూడా బుకింగ్స్ వస్తున్నాయని ఆ సంస్థ ప్రతినిధి వివరించారు. రానున్న సంవత్సరాల్లో మరిన్ని క్రూజ్ లైనర్లు తీసుకురావాలని, విశాఖను కేంద్రంగా సేవలు విస్తరించాలని ప్రభుత్వాన్ని కోరుతున్నారు.

ఇదిలా ఉండగా, విశాఖ నుంచి స్థానిక క్రూజ్‌లను నిర్వహించే ఆలోచన ప్రభుత్వానికి ఉంది. విశాఖ-పుదుచ్చేరి-చెన్నై, విశాఖ-పరదీప్ (ఒడిశా) లాంటి రూట్లలో కొత్త క్రూజ్‌లను నడిపే ప్రయత్నాలు జరుగుతున్నాయి. కార్డిలియో సంస్థ త్వరలో పశ్చిమ తీరంలో మరో రెండు భారీ క్రూజ్‌లను ప్రవేశపెట్టనుంది. ఆ తర్వాత ఎంప్రెస్ నాలుగు నెలల పాటు విశాఖ కేంద్రంగా పర్యాటకులకు అందుబాటులో ఉంటుందని సమాచారం.