కాకినాడలోని కోరింగ వైల్డ్ లైఫ్ శాంక్చురీలో పర్యాటక అభివృద్ధి; ప్లాస్టిక్ రహితంగా నిర్వహణ

కాకినాడ జిల్లా తాళరేవు మండలంలోని కోరింగ వైల్డ్ లైఫ్ శాంక్చురీలో అటవీ శాఖ అధికారులు పర్యాటక అభివృద్ధి చర్యలు చేపట్టారు. 60 వేల ఎకరాల్లో విస్తరించిన ఈ శాంక్చురీలో 40% నీరు, 60% మడ అడవులు ఉన్నాయి. ఇది దేశంలో రెండవ అతిపెద్ద మడ అటవీ ప్రాంతం.

పర్యాటకుల కోసం 3 కిలోమీటర్ల మేర బోటు ప్రయాణం ఏర్పాటు చేశారు. పూర్తి ప్లాస్టిక్ రహిత శాంక్చురీగా దీన్ని నిర్వహిస్తున్నారు. ప్రవేశ ద్వారం వద్దే ప్లాస్టిక్ వస్తువులను తనిఖీ చేసి, నీటి బాటిళ్లకు రూ.100 డిపాజిట్ తీసుకుంటారు.

వైల్డ్ లైఫ్ రేంజ్ ఆఫీసర్ వరప్రసాద్ మాట్లాడుతూ, ఇక్కడ విదేశీ పక్షులు ఏడాది పొడవునా వలస వస్తాయని తెలిపారు. ఇటీవల 70 నుంచి 80 ఫ్లెమింగో పక్షులను గుర్తించామని చెప్పారు. బాటిల్ గాడ్విట్, ఇండియన్ స్కిమ్మర్ వంటి పక్షులు కూడా కనిపిస్తాయి. ఈ మడ అడవుల ఆరోగ్యానికి సూచికగా పరిగణించే ఫిషింగ్ క్యాట్ జాతి 117 ఉన్నట్లు 2018లో గుర్తించామన్నారు.

అటవీ సంరక్షణతో పాటు స్థానిక గ్రామాల్లో ఉపాధి కల్పించేలా పర్యాటకాన్ని అభివృద్ధి చేస్తున్నట్లు వెల్లడించారు. గ్రీన్ క్లైమేట్ ఫండ్ (GCF) నుంచి నిధులు లభిస్తున్నాయని, ఇది అంతర్జాతీయ నిధుల సహాయమని వివరించారు. గతంలో ఏపీ టూరిజం శాఖ నిర్వహించిన బోటింగ్ కార్యక్రమాన్ని ప్రస్తుతం అటవీ శాఖే నిర్వహిస్తోంది. అన్ని భద్రతా చర్యలు పాటిస్తున్నట్లు చెప్పారు.