పత్తికి 20 రోజుల వ్యవధిలో ఎరువులు, సూక్ష్మ పోషకాల పిచికారి: ఆదిలాబాద్ కేవీకే శాస్త్రవేత్త సూచన

తెలుగు రాష్ట్రాల్లోని మెట్ట ప్రాంతాల్లో వర్షాధార పత్తి సాగు జరుగుతోంది. ప్రస్తుతం అడపా దడపా వర్షాలతో కొన్ని చోట్ల తేమ ఉండగా, మరికొన్ని చోట్ల బెట్ట పరిస్థితులు ఉన్నాయి. ఈ నేపథ్యంలో ఆదిలాబాద్ కృషి విజ్ఞాన కేంద్రం శాస్త్రవేత్త రఘువీర్ రైతులకు ఎరువుల యాజమాన్యంపై సూచనలు చేశారు.

ఎకరాకు 48 కేజీల నత్రజని, 24 కేజీల భాస్వరం, 24 కేజీల పొటాషియం అవసరం. భాస్వరం ఎరువును విత్తే సమయంలో DAP లేదా SSP రూపంలో అందించాలి. నత్రజని, పొటాషియంలను 20, 40, 60, 80 రోజుల వ్యవధిలో నాలుగు సమ భాగాలుగా విభజించి ఇవ్వాలి. ప్రతిసారీ 12 కేజీల నత్రజనితో పాటు 6 కేజీల పొటాషియం చొప్పున అందించాలి. రైతుల సౌలభ్యం కోసం 25 కేజీల యూరియా, 10 కేజీల పొటాష్ ప్రతి 20 రోజులకు ఒకసారి ఇస్తే సరిపోతుంది.

పత్తి పంటలో జింక్, మెగ్నీషియం, బోరాన్ సూక్ష్మ పోషకాల లోపాలు తరచుగా కనిపిస్తాయి. జింక్ లోపంతో ఆకులు చిన్నవై, కణుపుల దూరం తగ్గుతుంది. 2 గ్రాముల జింక్ సల్ఫేట్ లీటర్ నీటిలో కలిపి పైరుపై పిచికారి చేస్తే లోపం నివారణ అవుతుంది. మెగ్నీషియం లోపం వల్ల ముదురాకుల అంచులు పసుపురంగులోకి మారి, ఎర్రబడి రాలిపోతాయి. దీనికి 10 గ్రాముల మెగ్నీషియం సల్ఫేట్ లీటర్ నీటికి కలిపి వారం వ్యవధిలో రెండుసార్లు పిచికారి చేయాలి. బోరాన్ లోపం వల్ల పూత, పిందెలు రాలిపోతాయి. దీని నివారణకు 1.5 గ్రాముల బోరాక్స్ పౌడర్ లీటర్ నీటిలో కలిపి 10 రోజుల వ్యవధిలో 1-2 సార్లు పిచికారి చేయాలని శాస్త్రవేత్త సూచించారు.

ఈ ఎరువుల యాజమాన్యం పాటిస్తే పంట ఎదుగుదల మెరుగుపడి, దిగుబడి పెరిగే అవకాశం ఉంటుంది.