పత్తి పంటలో ఎరువుల యాజమాన్యం, రసం పీల్చే పురుగుల నివారణపై నిపుణుల సూచనలు

తెలుగు రాష్ట్రాల్లో పత్తి పంట వివిధ దశల్లో ఉంది. కొన్ని చోట్ల 20-25 రోజులు, మరికొన్ని చోట్ల 40-60 రోజుల వయస్సులో పంట ఉంది. సంగారెడ్డి జిల్లా తెలంగాణ రైతు విజ్ఞాన కేంద్రం కోఆర్డినేటర్ అరుణ ఈ పంటలో ఎరువుల యాజమాన్యం, రసం పీల్చే పురుగుల నివారణపై రైతులకు సూచనలు చేశారు.

విత్తిన విత్తన రకాన్ని బట్టి ఎరువుల మోతాదు మారుతుంది. సూటి రకాలు (straight varieties) విత్తిన వారు 36 కిలోల నత్రజని, 18 కిలోల భాస్వరం, 18 కిలోల పొటాషియం ఎరువులు వాడాలి. హైబ్రిడ్ రకాలు అయితే 48 కిలోల నత్రజని, 24 కిలోల భాస్వరం, 24 కిలోల పొటాషియం అవసరం. భాస్వరం ఎరువులను చివరి దుక్కిలో వేయాలి. నత్రజని, పొటాషియం ఎరువులను దశల వారీగా విభజించాలి. సూటి రకాలకు 30, 60, 90 రోజుల్లో మూడు దశలుగా వేయాలి. హైబ్రిడ్ రకాలకు 20, 40, 60, 80 రోజుల్లో నాలుగు దశలుగా వేయాలి. ప్రతి దశలో యూరియా రూపంలో 25 కిలోలు, మ్యూరేట్ ఆఫ్ పొటాష్ రూపంలో 10 కిలోలు వాడాలి.

ప్రస్తుతం సంగారెడ్డి జిల్లాలో రసం పీల్చే పురుగుల ఉద్రుతి కనిపిస్తోంది. ఇవి ఆకుల అడుగు భాగంలో ఉండి రసం పీలుస్తాయి. దీనివల్ల ఆకులు పసుపు రంగుకు మారి పంట దిగుబడి తగ్గుతుంది. నివారణ చర్యగా వేప నూనె 1500 PPM (5 మి.లీ లీటరు నీటికి, ఎకరాకు 1 లీటరు వేప నూనె 200 లీటర్ల నీటిలో కలిపి పిచికారీ), ఫిప్రోనిల్ (2 మి.లీ లీటరు నీటికి, లేదా 400 మి.లీ 200 లీటర్ల నీటిలో), ఫ్లోనికామిడ్ (0.3 గ్రాములు లీటరు నీటికి, 60 గ్రాములు 200 లీటర్ల నీటిలో) మందులతో పిచికారీ చేయాలి. ఇలా చేస్తే రసం పీల్చే పురుగులను నియంత్రించవచ్చని నిపుణులు తెలిపారు.