అమరావతి సమీపంలో కృష్ణా నది గట్టుపై భారీ మొసలి కలకలం

అమరావతి సమీపంలోని తాలాయపాలెం రేవు వద్ద కృష్ణా నది లంక గట్టుపై భారీ మొసలి కనిపించింది. చేపల వేటకు వెళ్లిన స్థానికులు మొసలిని చూసి ఒక్కసారిగా భయాందోళన చెందారు. ప్రజలు చేసిన అలికిడితో మొసలి వెంటనే నీటిలోకి జారుకుంది.

ఈ ఘటనను చూసిన వారు మొసలి ఫోటోలు తీయగా, అవి స్థానికంగా చర్చనీయాంశంగా మారాయి. ఆ ప్రాంతంలో మొసళ్లు పెరగడంపై స్థానికులు ఆందోళన వ్యక్తం చేస్తున్నారు.

కొందరు గ్రామస్తుల ప్రకారం, గత ప్రభుత్వ హయాంలో మరో ప్రాంతంలో పట్టుబడిన మూడు మొసళ్లను అటవీ శాఖకు అప్పగించకుండా కృష్ణా నదిలో విడిచిపెట్టారు. దీంతో మొసళ్ల సంఖ్య పెరిగి ఉండవచ్చని వారు అంటున్నారు. అటవీ శాఖ స్పందన లేదు.