ములుముడిలో కల్వర్టు వంతెన ప్రారంభం

నెల్లూరు జిల్లా ములుముడి గ్రామంలో కొత్తగా నిర్మించిన కల్వర్టు వంతెనను ఎమ్మెల్యే కోటం రెడ్డి శ్రీధర్ రెడ్డి, జిల్లా కలెక్టర్ హిమాన్షు శుక్లాతో కలిసి ప్రారంభించారు. ఈ వంతెన లేకపోవడంతో గత 40 ఏళ్లుగా ములుముడి, పొట్టేపాడు, నెల్లూరు రూరల్, సర్వేపల్లి, కోవూరు, ఉదయగిరి, ఆత్మకూరు, కడప జిల్లా బద్దేలు ప్రాంతాల వాసులు రాకపోకల్లో తీవ్ర ఇబ్బందులు పడుతున్నారు.

ఈ సందర్భంగా ఎమ్మెల్యే శ్రీధర్ రెడ్డి మాట్లాడుతూ, గత ప్రభుత్వాలు 10 సంవత్సరాల్లో చేయలేని అభివృద్ధిని ప్రస్తుత ప్రభుత్వం రెండేళ్లలోనే సాధించిందని పేర్కొన్నారు. తన నియోజకవర్గంలో రెండేళ్లలో రూ. 700 కోట్ల పనులు చేపట్టామని చెప్పారు.

జిల్లా కలెక్టర్ హిమాన్షు శుక్లా మాట్లాడుతూ, గతేడాది వరుసగా రెండు తుఫానులు వచ్చినప్పుడు మౌలిక సదుపాయాల లోపం స్పష్టమైందని తెలిపారు. శాశ్వత పరిష్కారంగా ఈ వంతెన నిర్మాణం ఆరు నెలల్లో పూర్తి చేశామన్నారు. ప్రజల సౌకర్యార్థం మిగతా పనులు కూడా వేగంగా పూర్తి చేస్తామని హామీ ఇచ్చారు.