లక్షల కరెన్సీ నోట్లతో కన్వర్ అలంకరణ; హర్యానాలో ఆకట్టుకుంటున్న దృశ్యం

హరిద్వార్ నుంచి గంగాజలం తీసుకెళ్తున్న ఓ శివభక్తుడు లక్షలాది రూపాయల కరెన్సీ నోట్లతో తన కన్వర్‌ను అలంకరించారు. ఈ ఘటన హర్యానాలోని జగాద్రి యమునానగర్ వద్ద రోడ్డుపై చోటుచేసుకుంది.

సుమారు 10 మంది భక్తుల బృందం హరిద్వార్ నుంచి బయలుదేరి సహరాన్‌పూర్ మీదుగా జగాద్రి వైపు ప్రయాణిస్తోంది. ఈ బృందంలో ఒక భక్తుడు 10, 20, 100, 500 రూపాయల నోట్లు కలిపి మొత్తం 2.70 లక్షల రూపాయల విలువైన నోట్లను దండలుగా తయారు చేసి కన్వర్‌ను అలంకరించాడు.

రోడ్డుపై ఈ కరెన్సీ కన్వర్ కనిపించగానే ప్రజలు పెద్ద సంఖ్యలో గుమికూడారు. చాలామంది మొబైల్‌ ఫోన్లలో వీడియోలు, ఫోటోలు తీసుకుని సోషల్ మీడియాలో షేర్ చేశారు. దీంతో ఈ వీడియోలు త్వరగా సోషల్ మీడియాలో వైరల్ అయ్యాయి.

తన భక్తిని ప్రత్యేకంగా చాటుకునే ఉద్దేశంతోనే ఈ అలంకరణ చేసినట్లు ఆ భక్తుడు తెలిపాడు. కన్వర్ యాత్రలో భక్తులు సాధారణంగా పూలు, రంగురంగుల వస్త్రాలు లేదా లైటింగ్‌తో అలంకరిస్తుంటారు. కరెన్సీ నోట్లతో అలంకరించడం ఇదే తొలిసారిగా నమోదైన ఘటన అని స్థానికులు చెబుతున్నారు.