తెలంగాణలో 6 నెలల్లో ₹617 కోట్ల సైబర్ క్రైమ్ నష్టం: పోలీసులు

తెలంగాణలో ఈ ఏడాది జనవరి నుండి జూన్ వరకు సైబర్ నేరాల వల్ల రాష్ట్ర ప్రజలు ₹617 కోట్లు పోగొట్టుకున్నారని సైబర్ క్రైమ్ పోలీసులు వెల్లడించారు. ఇందులో పోలీసులు వివిధ బ్యాంకు ఖాతాల్లో ₹158 కోట్లను ఫ్రీజ్ చేయగా, మిగతా నగదు రికవరీ సందిగ్ధంగా మారింది.

బాధితులు మోసం జరిగిన వెంటనే ‘గోల్డెన్ అవర్స్’లో ఫిర్యాదు చేయకపోవడంతో చాలా సొమ్ము తిరిగి రావట్లేదని అధికారులు తెలిపారు. ఏటా జరిగే సైబర్ నేరాల్లో సుమారు 10 శాతం సొమ్ము మాత్రమే రికవరీ అవుతోందని, గడువు దాటితే నగదు వెనక్కి రావడం కష్టమని చెప్పారు.

ఈ ఏడాది ఆరు నెలల్లో, హైదరాబాద్, ఢిల్లీ, ముంబై, కర్ణాటక ప్రాంతాల బాధితులు అధికంగా నమోదయ్యారు. ముఖ్యంగా ఆన్లైన్ ఇన్వెస్ట్మెంట్ మోసాలు, ఫెడెక్స్ కొరియర్, కస్టమ్స్, సీబీఐ పేరుతో డిజిటల్ అరెస్ట్ భయపెట్టే మోసాలు ఎక్కువగా నమోదవుతున్నాయి. ఓ మాజీ పోలీసు అధికారి భార్య స్టాక్ మార్కెట్ ట్రేడింగ్ పేరిట ₹2.58 కోట్లు కోల్పోయినట్లు అధికారులు తెలిపారు.

గ్రేటర్ హైదరాబాద్ పరిధిలోనే రాష్ట్రంలో అత్యధికంగా ₹445.82 కోట్లు కోల్పోయినట్లు, సైబరాబాద్ కమిషనరేట్ మొదటి స్థానంలో ఉండగా, హైదరాబాద్, మల్కాజ్గిరి, వరంగల్ కమిషనరేట్లు కూడా ఎక్కువ కేసులు నమోదుచేసినట్లు పోలీసులు వివరించారు. ములుగు జిల్లాలో 109 మంది బాధితులు ₹57.33 లక్షలు కోల్పోగా, అందులో ₹13.45 లక్షలను మాత్రమే పోలీసులు ఫ్రీజ్ చేయగలిగారు.

సైబర్ నేరగాళ్లు డార్క్ వెబ్ నుంచి కొనుగోలు చేసిన ఫోన్ నంబర్లు, ప్రత్యేక ఏజెన్సీల ద్వారా ఏర్పాటు చేసిన బ్యాంకు ఖాతాలతో వరుస మోసాలకు పాల్పడుతున్నారు. బాధితులు అప్రమత్తంగా లేకపోతే మరిన్ని నష్టాలు జరిగే అవకాశం ఉందని పోలీసులు హెచ్చరిస్తున్నారు.