రద్దీ వేళల్లో హైదరాబాద్‌లో భారీ వాహనాల ప్రవేశంపై సైబరాబాద్ ట్రాఫిక్ పోలీసుల ఆంక్షలు

హైదరాబాద్‌లో ట్రాఫిక్ రద్దీని తగ్గించడానికి సైబరాబాద్ ట్రాఫిక్ పోలీసులు చర్యలు చేపట్టారు. భారీ వాహనాలు, ప్రైవేట్ ట్రావెల్స్ బస్సులకు రద్దీ వేళల్లో నగరంలోకి ప్రవేశంపై ఆంక్షలు విధించారు.

ఉదయం 7:30 నుంచి 11:30 వరకు, సాయంత్రం 4:30 నుంచి రాత్రి 10:30 వరకు ఈ నో ఎంట్రీ అమల్లో ఉంటుంది. ORR లోపల అన్ని జాతీయ రహదారులు, ప్రధాన రహదారులపై ఈ ఆంక్షలు వర్తిస్తాయి.

నిబంధనలు ఉల్లంఘిస్తే మోటారు వాహన చట్టం ప్రకారం ₹1,600 జరిమానా విధిస్తారు. అవసరమైతే వాహనాన్ని సీజ్ చేస్తారు. వాహనాల RC, ఫిట్నెస్ సర్టిఫికెట్, పర్మిట్ వంటి పత్రాలను పరిశీలించేందుకు RTO అధికారులకు సమాచారం ఇస్తామని పోలీసులు హెచ్చరించారు.

పెద్ద బస్సులను నగరంలోకి అనుమతించకుండా, ప్రయాణికులను మినీ వ్యాన్లలో పికప్ చేసి నిర్దేశిత పార్కింగ్ ప్రాంతాలకు తరలించాలని పోలీసులు సూచించారు. నో ఎంట్రీ సమయం ముగిసిన తర్వాతే ప్రధాన బస్సులు బయలుదేరాలి.

మియాపూర్, ఆర్సీపురం, పఠాన్ చెరువు, కేపిహెచ్పి, కూకట్పల్లి, బాలానగర్, జీడిమెట్ల, మేడ్చల్ తదితర ప్రాంతాల్లో చెక్‌పోస్ట్‌లు ఏర్పాటు చేసినట్లు పోలీసులు తెలిపారు. ప్రత్యేక ఎన్‌ఫోర్స్‌మెంట్ బృందాలు ఉదయం, సాయంత్రం తనిఖీలు నిర్వహిస్తాయి.

నిబంధనలు పాటిస్తే నగరంలో ట్రాఫిక్ సజావుగా సాగుతుందని, ప్రజల ప్రయాణాలకు అంతరాయం ఉండదని పోలీసులు అభిప్రాయపడ్డారు.