తమిళ సినిమాల్లో దూసుకుపోతున్న తెలుగు నటీమణులు: శ్రీలీల నుంచి నాగదుర్గ వరకు వరుస ప్రాజెక్టులు

పలువురు తెలుగు నటీమణులు ప్రస్తుతం తమిళ చిత్ర పరిశ్రమలో వరుస అవకాశాలు పొందుతున్నారు. ఇప్పటికే అంజలి, ఐశ్వర్య రాజేష్, ఆనంది లాంటి నటీమణులు తమిళంలో గుర్తింపు సాధించగా, కొత్త తరం నటీమణులు కూడా ఇదే బాటలో నడుస్తున్నారు.

నటి శ్రీలీల 'పరాశక్తి' చిత్రంతో తమిళంలోకి అడుగుపెట్టారు. ప్రస్తుతం ధనుష్ సినిమాలో కథానాయికగా నటిస్తున్నారు. అజిత్ తదుపరి చిత్రంలోనూ ఆమె పేరు వినిపిస్తోంది. శ్రీ గౌరీ ప్రియ 'మ్యాట్' సినిమాతో గుర్తింపు పొందారు. ప్రస్తుతం తమిళంలో వరుస ప్రాజెక్టులతో బిజీగా ఉన్నారు.

'బేబీ' చిత్రంతో ప్రేక్షకుల దృష్టిని ఆకర్షించిన వైష్ణవి చైతన్య, నటుడు ఆర్యతో ఓ సినిమాలో నటిస్తున్నారు. జీవీ ప్రకాష్ కుమార్ చిత్రంలోనూ ఆమెకు అవకాశం వచ్చినట్లు సమాచారం. యూట్యూబ్ జానపద నృత్యకారిణి నాగదుర్గ తొలిసారి హీరోయిన్ గా 'LOL' (లవ్ ఓ లవ్) చిత్రంతో పరిచయమవుతున్నారు. ఈ చిత్రం జూలై 10న విడుదల కానుంది. విడుదలకు ముందే ఆమె 'ఇడుపు కాయితం' చిత్రంలోనూ హీరోయిన్ గా ఎంపికయ్యారు.

శ్రీదేవి 'కోర్టు' సినిమాతో మెప్పించి, ఇప్పటికే తమిళంలో అడుగుపెట్టారు. మానస చౌదరి 'ఆర్యన్ డీఎన్ఏ' చిత్రంలో నటించారు. మొత్తంగా తెలుగు నటీమణులు కోలీవుడ్ లో నిలకడగా అవకాశాలు దక్కించుకుంటున్నారు.