సైబరాబాద్‌లో ట్రాఫిక్ తగ్గించేందుకు పబ్లిక్ ట్రాన్స్‌పోర్ట్‌ వినియోగించాలని పోలీసుల విజ్ఞప్తి

సైబరాబాద్ ఐటీ కారిడార్లో ట్రాఫిక్ ఇబ్బందులు పెరుగుతున్నాయి. హైటెక్ సిటీ, రాయదుర్గం, గచ్చిబౌలి, ఫైనాన్షియల్ డిస్ట్రిక్ట్, నానక్రామగూడ ప్రాంతాల్లో కిలోమీటర్ల మేర వాహనాలు నిలిచిపోయే పరిస్థితి ఉంది. రోజుకు 11 లక్షలకు పైగా వాహనాలు ఈ కారిడార్‌లో రాకపోకలు సాగిస్తున్నాయి.

వర్షాకాలంలో సమస్య మరింత తీవ్రమవుతుందని సైబరాబాద్ ట్రాఫిక్ పోలీసులు తెలిపారు. వర్షం కురిసినప్పుడు రోడ్లపై ఇసుక, మట్టి నిలిచే సమస్యలను ఇతర శాఖల సహకారంతో క్లియర్ చేస్తున్నామని చెప్పారు. భారీ వర్షాల హెచ్చరికలున్నప్పుడు ప్లాన్-ఎ, ప్లాన్-బి అనే రెండు ప్రణాళికలను సిద్ధంగా ఉంచుతున్నామని, ప్లాన్-బిలో కొన్ని జంక్షన్లపై బ్యారికేడ్లు తొలగించి ట్రాఫిక్ మళ్లిస్తామని వివరించారు.

వాతావరణ శాఖ నుంచి లభించే సూచనల ఆధారంగా ముందస్తుగా ఐటీ కంపెనీలకు అడ్వైజరీ ఇవ్వడానికి సొసైటీ ఫర్ సైబరాబాద్ సెక్యూరిటీ కౌన్సిల్ (SCSC) తో కలిసి పనిచేస్తున్నట్లు మాదాపూర్ పోలీసులు తెలిపారు. SCSC ద్వారా ఐటీ కంపెనీల హెచ్ఓడీలకు అడ్వైజరీ పంపిస్తున్నామని, వారు ఉద్యోగులకు స్పష్టమైన సూచనలిస్తారని చెప్పారు.

ట్రాఫిక్ తీవ్రతకు ప్రధాన కారణం ఉద్యోగులు ఒకేసారి రోడ్డెక్కడమేనని పోలీసులు అభిప్రాయపడ్డారు. వ్యక్తిగత వాహనాల వాడకం తగ్గించి మెట్రో రైలు, ఆర్టీసీ బస్సులు, కంపెనీ బస్సులు, కార్ పూలింగ్, షటిల్ సర్వీసులు వినియోగించుకోవాలని సూచించారు. ఇటీవలి సర్వేలో 50% వాహనాలు కారు లేదా ద్విచక్ర వాహనంలో ఒక్కరే ప్రయాణిస్తున్నట్టు గుర్తించామని, పూలింగ్ వెహికల్స్ వాడితే 40 నుంచి 50% వరకు ట్రాఫిక్ తగ్గించవచ్చని పోలీసులు తెలిపారు. ఐటీ కంపెనీలు ఆఫీస్ టైమింగ్‌లు మార్చడం కూడా ట్రాఫిక్ సమస్యను తగ్గించడంలో ఉపయోగపడుతుందన్నారు.