మురసు తుఫాను: పశ్చిమ గోదావరి, ఏలూరులో భారీ వర్షాలు.. విద్యుత్ సరఫరాకు అంతరాయం

మురసు తుఫాను తీరం దాటే ప్రక్రియ ప్రారంభమైంది. మరో రెండు గంటల్లో తీరం దాటే అవకాశం ఉందని సమాచారం. దీని ప్రభావంతో ఉమ్మడి పశ్చిమ గోదావరి జిల్లాలోని నరసాపురం, పాలకొల్లు ప్రాంతాల్లో నిన్న రాత్రి నుంచి భారీ వర్షాలు కురుస్తున్నాయి. ఈదురుగాలులతో కూడిన వర్షాల వల్ల పలు ప్రాంతాల్లో విద్యుత్ సరఫరాకు అంతరాయం ఏర్పడింది.

కొన్ని ప్రాంతాల్లో గతంలో పునరుద్ధరించిన విద్యుత్ సరఫరాను కూడా అధికారులు మళ్లీ నిలిపివేశారు. విద్యుత్ స్తంభాల మరమ్మతులు, పునరుద్ధరణ పనులపై ప్రత్యేక చర్యలు చేపట్టారు. ఏలూరు, పోలవరం ప్రాంతాల్లోనూ రాత్రి నుంచి వర్షం కొనసాగుతోంది. ఈదురుగాలులతో కూడిన వర్షం కారణంగా అధికారులు అప్రమత్తమయ్యారు.

ఏలూరులో ప్రత్యేక కంట్రోల్ రూమ్లు ఏర్పాటు చేశారు. నదీ పరివాహక, సముద్రతీర ప్రాంతాల్లో అధికారులు అలర్ట్‌గా ఉన్నారు. సముద్రతీర ప్రాంతాలకు ప్రజలు వెళ్లకూడదని ముందుగానే హెచ్చరికలు జారీ చేశారు. నరసాపురం ప్రాంతంలో మత్స్యకారులను సముద్రంలోకి వెళ్లవద్దని ఆదేశించారు.

గతంలో పునరావాస కేంద్రాలకు తరలించిన వారిని మళ్లీ పునరావాస కేంద్రాలకు తరలించారు. ఏలూరు జిల్లాలోని గిరిజన, ఏజెన్సీ ప్రాంతాల్లో కొండచరియలు విరగడం, వాగులు వంకలు పొంగడం వంటి ప్రమాదాలపై జాగ్రత్తలు తీసుకోవాలని అధికారులు సూచించారు. పోలీసు బందోబస్తు ఏర్పాటు చేశారు.

ఈరోజు ప్రభుత్వ, అన్ని రకాల పాఠశాలలకు సెలవు ప్రకటించారు. తుఫాను తీరం దాటిన తర్వాత కూడా భారీ నుంచి అతిభారీ వర్షాలు కురిసే అవకాశం ఉందని అధికారులు హెచ్చరించారు. ప్రజలు ఇళ్లలోనే ఉండాలని, అవసరమైతేనే బయటకు రావాలని సూచించారు.