వరంగల్‌లో తండ్రి చేనేత తివాచీ కళను కాపాడుతున్న కుమార్తె

వరంగల్ నగరంలోని ఉర్సు కరీమాబాద్‌కు చెందిన కంచ నరసింహరావు దాదాపు 50 ఏళ్లుగా నిలువు మగ్గంపై తివాచీలు తయారు చేస్తున్నారు. ఈ అరుదైన కళ మారుతున్న కాలం, ఎలక్ట్రానిక్ మిషన్ల వల్ల అంతరించిపోతుందని ఆయన ఆందోళన చెందారు.

ఆయన కుమార్తె సమత, తండ్రి మనోవేదన గమనించి, ఈ వారసత్వ కళను కొనసాగించాలని నిర్ణయించుకుంది. చేతితో గీసిన డిజైన్ల స్థానంలో కంప్యూటర్ డిజైన్లను ప్రవేశపెట్టి, వాట్సాప్ ద్వారా మార్కెటింగ్ మెరుగుపరిచింది.

సమత ఇప్పటివరకు 50 మందికి శిక్షణ ఇవ్వగా, 10 మంది ప్రస్తుతం రోజువారీ పని చేస్తున్నారు. నెలవారీ ఖర్చులు పోను ఆమెకు సుమారు ₹10,000 ఆదాయం మిగులుతోంది. తివాచీలతో పాటు పూజ ఆసనాలు, డెకరేటివ్ ఐటమ్స్, వాల్పేపర్లు, సోఫా కవర్లు వంటివి కూడా తయారు చేస్తున్నారు.

రాష్ట్ర ప్రభుత్వం గతేడాది సమత పనితనాన్ని గుర్తించి ఉత్తమ పురస్కారంతో సత్కరించింది. క్రాఫ్ట్ కౌన్సిల్ ఆఫ్ ఇండియా నుంచి రామయ్య ఎక్సలెన్స్ అవార్డు కూడా అందుకుంది. ప్రభుత్వం లోన్ సహకారం అందిస్తే తయారీని ఫ్యాక్టరీ స్థాయికి విస్తరించాలని సమత ఆశిస్తోంది.