ఢిల్లీ తుగ్లకాబాద్‌లో ఐదంతస్తుల భవనంలో భారీ అగ్నిప్రమాదం: ఒకరు మృతి, ఎనిమిది మంది గాయాలు

ఢిల్లీలోని తుగ్లకాబాద్ ప్రాంతంలో శనివారం మధ్యాహ్నం ఓ ఐదంతస్తుల నివాస భవనంలో భారీ అగ్నిప్రమాదం సంభవించింది. ఈ ప్రమాదంలో ఒక వ్యక్తి మృతి చెందగా, ఎనిమిది మంది గాయపడ్డారు. భవనంలో మొత్తం తొమ్మిది ఫ్లాట్లు ఉండగా, అన్ని కుటుంబాల సభ్యులు దాదాపు 22-23 మంది నివసిస్తున్నారు.

మంటలు వేగంగా వ్యాపించడంతో నిలిపి ఉన్న ఏడు బైక్‌లు, ఓ స్కూటీ పేలిపోయాయి. స్థానిక నివాసితులు వెంటనే స్పందించి పైకప్పు నుంచి చీరలు, నెట్‌ల సాయంతో అనేక మందిని సురక్షితంగా బయటకు తీసుకొచ్చారు. మృతుడి పేరు పంకజ్ అని, అతను నాలుగో అంతస్తులో నివసించేవాడని ప్రత్యక్ష సాక్షులు తెలిపారు.

ప్రమాదం మధ్యాహ్నం 2:00 గంటల ప్రాంతంలో చోటు చేసుకుంది. స్థానికులు ఫైర్ బ్రిగేడ్‌కు సమాచారం ఇవ్వడంతో బృందాలు ఘటనాస్థలానికి చేరుకుని మంటలను అదుపులోకి తెచ్చాయి. గాయపడిన ఎనిమిది మందిని సమీప ఆసుపత్రికి తరలించారు.

ప్రాథమిక సమాచారం ప్రకారం, పార్కింగ్ ఏరియాలో నిలిపి ఉన్న వాహనాల నుంచే మంటలు ప్రారంభమైనట్లు చెబుతున్నారు. విద్యుత్ షార్ట్ సర్క్యూట్ వల్ల ప్రమాదం జరిగిందా లేక ఇతర కారణాలు ఏమన్నా ఉన్నాయా అనే కోణంలో పోలీసులు దర్యాప్తు చేపట్టారు. ఢిల్లీలో ఇటువంటి అగ్నిప్రమాదాలు ఇది మొదటిది కాదు, గతంలోనూ పార్కింగ్ ప్రాంతాల్లో మంటలు వ్యాపించిన ఘటనలు చోటు చేసుకున్నాయి.

స్థానికుల అప్రమత్తత కారణంగా ప్రాణ నష్టం తక్కువగా ఉందనీ, పూర్తిస్థాయిలో సహాయం అందడంతో మరిన్ని ప్రమాదాలు తప్పాయని అధికారులు వ్యాఖ్యానించారు. దర్యాప్తు పూర్తయ్యాక నిందితుల పై చర్యలు తీసుకుంటామని పోలీస్ ఉన్నతాధికారులు తెలిపారు.