ఏలూరు జిల్లాలో కాల్వల మరమ్మతులు వేగవంతం; ఖరీఫ్‌కు సాగునీటికి ఇబ్బంది లేదు: అధికారి

ఏలూరు జిల్లా వ్యాప్తంగా కాల్వల మరమ్మత్తు పనులు చురుకుగా సాగుతున్నాయని జల వనరుల శాఖ కార్యనిర్వహణ అధికారి (ఇఈ) దేవ ప్రకాష్ అన్నారు. ఖరీఫ్ సీజన్‌కు సిద్ధమవుతున్న రైతులకు సాగునీటి ఇబ్బందులు తలెత్తకుండా అన్ని ఏర్పాట్లు చేస్తున్నామని ఆయన హామీ ఇచ్చారు.

ఈటీవీ ప్రతినిధితో ప్రత్యేక ఇంటర్వ్యూలో ఆయన మాట్లాడుతూ, ప్రభుత్వం 354 కాల్వల పనులకు అనుమతులు ఇచ్చిందని, వాటిలో 324 పనులు ప్రారంభమయ్యాయని వివరించారు. మిగిలిన 26 పనులు టెండర్ దశలో ఉండగా, త్వరలోనే అవి కూడా మొదలవుతాయని చెప్పారు.

మేజర్ ఇరిగేషన్ కింద గోదావరి నీటిని ఏలూరు కాల్వ ద్వారా ఒంగుటూరు నియోజకవర్గానికి చేరుస్తున్నట్లు ఆయన తెలిపారు. ఇటీవల 315 క్యూసెక్కుల నీటిని విడుదల చేయగా, దీన్ని చివరి పొలం వరకు సమర్ధంగా చేర్చేలా చర్యలు తీసుకుంటున్నామని పేర్కొన్నారు. మీడియం ఇరిగేషన్ కింద తమ్మిలేరు, ఎర్ర కాల్వ రిజర్వాయర్లు నిండుగా ఉండగా, జులై నుంచి లెఫ్ట్, రైట్ కెనాల్‌ల కింద 15 వేల ఎకరాలకు సాగునీరు ఇవ్వనున్నట్లు వివరించారు.

జలధార-జలహారతి కార్యక్రమంలో భాగంగా జిల్లాలోని 1513 చెరువుల సంరక్షణ, డీసిల్టింగ్ పనులు వేగంగా జరుగుతున్నాయని దేవ ప్రకాష్ చెప్పారు. ఓ అండ్ ఎం నిధులతో 354 వర్క్‌లు మంజూరు చేయగా, నెలాఖరుకల్లా డీసిల్టింగ్ పూర్తి చేస్తామని ఆయన హామీ ఇచ్చారు. కెనాల్స్‌లో చేపల వల, తూడు, గడ్డి తొలగింపు పనులను ఖరీఫ్ సీజన్ మొత్తం కొనసాగిస్తామని, ఇందుకోసం బోట్లు, కార్మికులను సిద్ధం చేశామని తెలిపారు.

రాబోయే ఖరీఫ్‌ సీజన్‌లో రైతులకు ఎలాంటి నీటి కొరత లేకుండా జిల్లా అధికారులు పూర్తి స్థాయి ప్రణాళికతో ముందుకు సాగుతున్నారు. సకాలంలో సాగునీరు అందించడంతో పాటు చెరువులు, కాల్వల ఆధునీకరణపై ప్రత్యేక దృష్టి పెట్టామని అధికారి దేవ ప్రకాష్ వివరించారు.