కర్రెగుట్టలపై తొలిసారి అధికారిక బృందం: డీజీపీ సీవీ ఆనంద్ పర్యటన

తెలంగాణ డీజీపీ సీవీ ఆనంద్ ములుగు జిల్లా వెంకటాపురం మండలంలోని కర్రెగుట్టల ప్రాంతాన్ని సందర్శించారు. స్వతంత్ర భారతదేశ చరిత్రలో తొలిసారిగా ఒక ప్రభుత్వ అధికార బృందం ఇక్కడికి చేరుకుందని ఆయన తెలిపారు.

కర్రెగుట్టలు గతంలో మావోయిస్టులకు కీలక స్థావరంగా ఉండేవి. అయితే గత రెండేళ్లలో తెలంగాణ, ఛత్తీస్గఢ్ పోలీసులతో పాటు కేంద్ర బలగాలు సంయుక్తంగా చేపట్టిన ‘ఆపరేషన్ కగార్’ కారణంగా మావోయిస్టుల ప్రభావం పూర్తిగా తగ్గిందని డీజీపీ వివరించారు. పలువురు నేతలు లొంగిపోవడం లేదా ఎన్కౌంటర్లలో మృతి చెందడంతో ప్రాంతం శాంతియుతంగా మారింది.

పర్యటనలో భాగంగా డీజీపీ, జిల్లా కలెక్టర్, ఎస్పీ, డీఎఫ్ఓతో సహా అధికార బృందం జాతీయ పతాకాన్ని ఆవిష్కరించింది. గత ఆరు నెలల్లో పామునూరు, మురుమూరు, జల్ల, డోలి, తడపాల వరకు సుమారు 33 కిలోమీటర్ల మట్టి రోడ్డు నిర్మించినట్టు చెప్పారు. దీన్ని బీటీ రోడ్డుగా మార్చి పరిసర ప్రాంతాలకు అనుసంధానించే ప్రణాళిక సిద్ధమైందన్నారు.

కర్రెగుట్టల సహజ అందాలను ఉపయోగించుకొని పర్యాటక అభివృద్ధికి అవకాశాలు పరిశీలిస్తున్నామని డీజీపీ తెలియజేశారు. అటవీ సంరక్షణకు భంగం కలగకుండా టూరిజాన్ని ప్రోత్సహిస్తామని, స్థానిక గిరిజనులకు ఉపాధి కల్పిస్తామని చెప్పారు. పామునూరు గ్రామస్థులకు నిత్యావసర వస్తువులు, దుస్తులు పంపిణీ చేసి వారి అవసరాలు అడిగి తెలుసుకున్నారు.

అనంతరం లొంగిపోయిన మావోయిస్టులతో సమావేశమై వారికి ఉచిత వైద్యం కోసం ఆరోగ్య రక్షణ కార్డులు అందజేశారు. ఇంకా ఆయుధాలు వదలని సెంట్రల్ కమిటీ సభ్యులు ముప్పాల లక్ష్మణరావు (గణపతి) సహా మరో 17 మంది నేతలు లొంగిపోవాలని ఆయన పిలుపునిచ్చారు. ప్రభుత్వం సరెండర్, పునరావాస విధానాన్ని చురుగ్గా అమలు చేస్తోందని స్పష్టం చేశారు.