ధర్మస్థల కేసు: సిట్ తుది నివేదిక కోర్టుకు సమర్పణ, ఆరోపణలు నిరాధారమని తేల్చింది

ధర్మస్థలలో పెద్ద ఎత్తున హత్యలు జరిగాయన్న ఆరోపణలపై సిట్ (స్పెషల్ ఇన్వెస్టిగేషన్ టీమ్) బృందం తుది నివేదికను కోర్టుకు సమర్పించింది. ఏడాది దర్యాప్తు తర్వాత 7000 పేజీల నివేదికతో పాటు 250 మందికి పైగా సాక్షుల వాంగ్మూలాలు, డిజిటల్ ఆధారాలు కోర్టు ముందుంచారు.

నివేదిక ప్రకారం, ఫిర్యాదుదారు చిన్నయ్య చేసిన సామూహిక హత్యల ఆరోపణలు కల్పితమని సిట్ నిర్ధారించింది. మంజునాథ ఆలయ ధర్మాధికారి వీరేంద్ర హెగ్గడే ఆదేశాలతో హత్యలు జరిగాయన్న ఆరోపణలకు ఎలాంటి ఆధారాలు లేవని తేల్చింది. ఫారెన్సిక్ పరీక్షల్లో అస్థిపంజరాలు, ఎముకలపై అనుమానాస్పద విషయాలు లేవని నివేదిక పేర్కొంది.

అంతేకాక, ఫిర్యాదుదారు చిన్నయ్యపై తప్పుడు సాక్ష్యం చెప్పించినందుకు సిట్ క్రిమినల్ కేసు నమోదు చేసింది. చిన్నయ్య తనను కొందరు వ్యక్తులు బెదిరించి తప్పుడు ఫిర్యాదు చేయించారని కర్ణాటక హైకోర్టును ఆశ్రయించడం విశేషం. నివేదిక సమర్పణతో దర్యాప్తు ముగిసి, కేసు న్యాయ పరిశీలన దశలోకి వెళ్ళింది.

15 ప్రదేశాల్లో తవ్వకాలు, ఫారెన్సిక్ ల్యాబ్ రిపోర్టులు, సాక్షుల వీడియోలు ఉన్న హార్డ్ డిస్క్ వంటి భౌతిక, శాస్త్రీయ సాక్ష్యాలను సిట్ కోర్టుకు అందించింది. కోర్టు విచారణను ఆగస్టు 29కి వాయిదా వేసింది. ఇప్పుడు సిట్ నివేదిక, సాక్ష్యాల ఆధారంగా కోర్టు తదుపరి న్యాయపరమైన చర్యలు నిర్ణయించనుంది.