రాహుల్ గాంధీ అబద్ధాలు చెబుతున్నారు, కాంగ్రెస్ ప్రజాస్వామ్యం సెలెక్టివ్: కేంద్ర మంత్రి ధర్మేంద్ర ప్రధాన్ విమర్శ

కేంద్ర విద్యా శాఖ మంత్రి ధర్మేంద్ర ప్రధాన్, కాంగ్రెస్ పార్టీ, ప్రతిపక్ష నేత రాహుల్ గాంధీపై తీవ్ర విమర్శలు చేశారు. ఓ సోషల్ మీడియా వీడియోలో ఆయన మాట్లాడుతూ, కాంగ్రెస్ విద్యార్థుల ప్రయోజనాలపై నిరంతరం అబద్ధాలు వ్యాప్తి చేస్తోందని, రాహుల్ గాంధీ వాస్తవాలు లేకుండా మాట్లాడుతున్నారని ఆరోపించారు. ప్రతిపక్ష నేత పార్లమెంటుకు రావడానికి ఇష్టపడట్లేదని, సమాధానాలు వినడానికి ఆయన సిద్ధంగా లేరని ప్రధాన్ విమర్శించారు.

కేంద్ర హోంమంత్రి అమిత్ షాపై కాంగ్రెస్ చేస్తున్న నిరాధార ఆరోపణలు ఆ పార్టీ రాజకీయ నిరాశను వెల్లడిస్తున్నాయని ధర్మేంద్ర ప్రధాన్ అన్నారు. ప్రతి అంశంపై ప్రభుత్వం పార్లమెంటులో చర్చకు సిద్ధంగా ఉన్నప్పటికీ, కాంగ్రెస్ ప్రజాస్వామ్య ఆలయాన్ని అడ్డుకుంటూ, దేశ, యువత ప్రయోజనాలను దెబ్బతీస్తోందని ఆరోపించారు. కాంగ్రెస్ ప్రాధాన్యత దేశ సంక్షేమం కాదని, సొంత ప్రయోజనాలను ముందుంచుకుంటుందని చెప్పారు.

సభలో చర్చ జరిగితే బయట గందరగోళం సృష్టించడం కాంగ్రెస్ అలవాటని, అందుకు కారణం సభలో సమాధానాలు వినే సామర్థ్యం వారికి లేకపోవడమేనని ప్రధాన్ తెలిపారు. కాంగ్రెస్ ప్రజాస్వామ్యం సెలెక్టివ్ గా ఉందని, తాము అధికారంలో ఉన్న చోట యువతపై హింస, రాజకీయంగా వెలుగులో ఉండాలనుకున్న చోట అబద్ధాలు, అల్లరి చేస్తారని ఆయన వ్యాఖ్యానించారు. ఝార్ఖండ్‌లో విద్యార్థులపై జరిగిన దారుణాన్ని యావత్ దేశం చూసిందని, అయినా ప్రతి అంశంపై విలేకరుల సమావేశాలు నిర్వహించే రాహుల్ గాంధీ మౌనం వహించడం ప్రశ్నార్థకమని అన్నారు. ఈ ద్వంద్వ వైఖరిని యువత అర్థం చేసుకుందని ప్రధాన్ పేర్కొన్నారు.

ఎమర్జెన్సీ కాలపు మనస్తత్వంతో పనిచేసే కాంగ్రెస్ పార్టీ, ప్రజాస్వామ్యంలో నియంతృత్వానికి చోటు లేదని గుర్తించాలని ధర్మేంద్ర ప్రధాన్ హెచ్చరించారు.