నీట్ పున:పరీక్షకు ముందు విద్యార్థులకు ధైర్యం చెప్పిన ధర్మేంద్ర ప్రధాన్

NEET పున:పరీక్ష రాస్తున్న విద్యార్థులకు కేంద్ర విద్యాశాఖ మంత్రి ధర్మేంద్ర ప్రధాన్ ధైర్యం చెప్పారు. నిర్భయంగా, చింత లేకుండా పరీక్షకు హాజరుకావాలని ఆయన పిలుపునిచ్చారు. ఈ రోజు దేశవ్యాప్తంగా సుమారు 22 లక్షల మంది విద్యార్థులు NEET పరీక్ష రాస్తున్నారని, వారందరికీ శుభాకాంక్షలు తెలియజేశారు. భారతదేశ వ్యవస్థపై, ఎన్టీఏ, రాష్ట్ర ప్రభుత్వాలు, జిల్లా యంత్రాంగంపై తనకు పూర్తి నమ్మకం ఉందని ప్రధాన్ అన్నారు. విద్యార్థుల భవిష్యత్తుతో ఎవరూ చెలగాటం ఆడొద్దని, పరీక్ష సమయంలో వారి మానసిక ఆరోగ్యాన్ని దెబ్బతీసేలా ప్రవర్తించొద్దని కొందరు ‘బాధ్యతగల వ్యక్తులు’ అని చెప్పుకునే వారిని ఆయన హెచ్చరించారు. ఈ నేపథ్యంలో నిన్న (బుధవారం) కొంతమంది తప్పుడు ఉద్దేశంతో విద్యార్థులకు ఇబ్బంది కలిగించారని, అలాంటి వారిని బాధ్యతగా వ్యవహరించాలని కోరారు. కాగా, CBSE పరీక్షల రీఅసెస్మెంట్, రీవెరిఫికేషన్ ప్రక్రియ చివరి దశలో ఉందని, త్వరలోనే మిగిలిన ఫలితాలు వెల్లడిస్తామని ఆయన స్పష్టం చేశారు. ఇప్పటికే 17 లక్షల మంది విద్యార్థుల్లో 15 లక్షల ఫలితాలు విడుదలైనట్లు తెలిపారు. ఏ విధమైన అవ్యవస్థకు తావులేకుండా చర్యలు తీసుకుంటామని ప్రధాన్ హామీ ఇచ్చారు.