దీపావళి లక్ష్మీ పూజకు కలశ స్థాపన ఎలా చేయాలి? పద్ధతి వివరాలు

ఇంటి సంప్రదాయం ఉన్నవారు కలశ స్థాపన చేస్తారు. లక్ష్మీదేవి పూజకు కలశం పెట్టాలనుకుంటే, సత్యనారాయణ వ్రతం లేదా వరలక్ష్మీ వ్రతం సమయంలో పెట్టే విధంగానే చేయాలి.

మొదట విఘ్నేశ్వరుడిని పూజించాలి. బియ్యం పోసి పసుపుతో గణపతిని చేసి పూజ చేయాలి. ఆ తర్వాత కలశం కింద కూడా బియ్యం పోయాలి. పూర్వం ధాన్యం పోసేవారు. బియ్యం ధాన్యానికి ప్రతిరూపం కాబట్టి ఇప్పుడు బియ్యం వాడుతున్నారు.

కలశంలో నీరు పోసి రాగి నాణెం వేయాలి. ఇంట్లో పాత రాగి నాణెం ఉంటే దాన్ని వేస్తారు. లేకపోతే ఇప్పుడు దొరికే నాణెం వేసుకోవచ్చు. పైన కొందరు కొబ్బరికాయ పెడతారు. కొందరు కొబ్బరి బొండం పెట్టే పద్ధతి ఉంది.

కలశాన్ని ఎన్ని రోజులు ఉంచాలనేది ఆచారాన్ని బట్టి మారుతుంది. కొందరు మూడు రోజులు, కొందరు ఐదు రోజులు ఉంచుతారు. త్రయోదశి, చతుర్దశి, అమావాస్య, బలిపాడ్యమి, యమద్వితీయ అనే ఐదు రోజులు ఉంచేవారు ఉన్నారు. దక్షిణాదిలో ఎక్కువగా దీపావళి అమావాస్య రోజు ఒక్క రోజే కలశం పెడతారు. ఉత్తరాదిలో ఎక్కువ రోజులు ఉంచే పద్ధతి ఎక్కువగా కనిపిస్తుంది.

షోడశోపచారాలతో పూజ చేసి మధురమైన పిండి వంటలు నివేదన చేస్తారు. కొందరు కొత్త పద్దుల దస్త్రాలను కూడా పెడతారు. దసరా సమయంలో కొత్త పద్దులు రాసుకునే ఆచారం ఉంది. ఇప్పుడు చాలా మంది ఫోన్, ల్యాప్‌టాప్‌లోనే లెక్కలు నడిపినా, పుస్తకాలు పెట్టే పద్ధతి కొన్ని ఇళ్లలో కొనసాగుతోంది. మన ప్రాంతాల్లో ఈ పద్ధతి ఎక్కువగా ఉగాది రోజున కనిపిస్తుంది.