రాజన్న సిరిసిల్ల జిల్లాలో కరువు: ట్యాంకర్ నీళ్లతో పత్తి పంటకు రైతు ప్రయత్నం

రాజన్న సిరిసిల్ల జిల్లా వేములవాడ మండలంలోని అయ్యోరుపల్లిలో తీవ్ర కరువు పరిస్థితులు నెలకొన్నాయి. వర్షాలు పడకపోవడంతో పత్తి పంటను కోల్పోతున్న రైతు ఉల్లెందుల పోచయ్య ట్యాంకర్ల ద్వారా నీళ్లు తీసుకొచ్చి పొలానికి నీరు పెడుతున్నారు.

మే చివరి వారంలో రూ.25,000 ఖర్చు చేసి పత్తి విత్తనాలు నాటారు. కానీ ఎండల తీవ్రతతో అవి భూమిలోనే ఎండిపోయాయి. మళ్లీ మరో రూ.25,000 పెట్టి విత్తనాలు వేశారు. ప్రస్తుతం ఒక్కో ట్యాంకర్ నీటికి రూ.1,500 చొప్పున చెల్లిస్తూ పంటకు నీరు అందిస్తున్నారు.

గతంలో ఎప్పుడూ ఇలాంటి పరిస్థితి ఎదురుకాలేదని స్థానికులు చెబుతున్నారు. వర్షాభావం, భూగర్భ జలాలు తగ్గిపోవడంతో రైతులు తీవ్ర ఇబ్బందులు పడుతున్నారు.