హైదరాబాద్‌లో ఇందిరమ్మ ఇండ్ల దరఖాస్తు గడువు ఆగస్టు 15 వరకు పొడిగింపు; ఆసరా పెన్షన్ గడువు నెలాఖరు వరకు

హైదరాబాద్‌లో ఇందిరమ్మ ఇండ్ల దరఖాస్తు గడువు ఆగస్టు 15 వరకు పొడిగించారు.

హైదరాబాద్‌లో 16 నియోజకవర్గాల పరిధిలో 7,340 ఇళ్ల నిర్మాణం జరగనుంది. నిన్నటి వరకు 46,000 దరఖాస్తులు వచ్చాయి. కూకట్‌పల్లిలో 6,500, మహేశ్వరం‌లో 734 దరఖాస్తులు నమోదయ్యాయి. ఒక్కో ఇంటికి సగటున ఆరుగురు పోటీ పడుతున్నారు.

దరఖాస్తు మీసేవ కేంద్రాలు, ప్రభుత్వ వెబ్‌సైట్, వాట్సాప్ నెంబర్ ద్వారా చేసుకోవచ్చు. రూ.10,000 డిపాజిట్ చెల్లించాలి. ఇల్లు నిర్మాణానికి మొత్తం రూ.11 లక్షలు ఖర్చు కాగా, అందులో రూ.5 లక్షలు ప్రభుత్వ సబ్సిడీ. మిగతా రూ.6 లక్షలు లబ్ధిదారులే భరించాలి. లాటరీ ద్వారా అర్హులను ఎంపిక చేస్తారు. ఇల్లు రాని వారికి డిపాజిట్ రూ.10,000 తిరిగి ఇస్తారు.

ఆసరా పెన్షన్ దరఖాస్తు గడువు కూడా ఈ నెలాఖరు వరకు పొడిగించారు. అర్హతలు, కేటగిరీలు గుర్తించి దరఖాస్తు చేసుకోవాలి. ఆధార్, రేషన్ కార్డు, బ్యాంకు ఖాతా పాస్‌బుక్, వోటర్ ఐడీ వంటి డాక్యుమెంట్లతో పాటు వితంతువు, వికలాంగ, ఒంటరి మహిళ వర్గాలకు సంబంధిత సర్టిఫికెట్లు కూడా అవసరం. గ్రామీణ ప్రాంతాల్లో పంచాయతీ ఆఫీసుల్లో, పట్టణాల్లో వార్డ్ ఆఫీసుల్లో, మండలాల్లో మండల ఆఫీసుల్లో దరఖాస్తు సమర్పించాలి. ప్రభుత్వం ఆగస్టు 15 నాటికి 2.5 లక్షల కొత్త పింఛన్లు ఇప్పించాలని లక్ష్యంగా పెట్టుకుంది.