డీఎస్పీ భీమరెడ్డి అక్రమాస్తుల కేసు: బెనామీలుగా హోమ్గార్డులు, డ్రైవర్లు, వాచ్మెన్లు

ఆదాయానికి మించి ఆస్తుల కేసులో ACB అధికారులు డీఎస్పీ భీమరెడ్డి (DSP Bheem Reddy)ని అరెస్టు చేశారు. నిన్న సాయంత్రం అతన్ని అదుపులోకి తీసుకుని, ACB కార్యాలయంలో ప్రాపర్టీ డాక్యుమెంట్లపై సంతకాలు తీసుకున్నారు. రాత్రి ఉస్మానియా ఆసుపత్రిలో వైద్య పరీక్షలు నిర్వహించారు. ఇవాళ తెల్లవారుజామున 6 గంటలకు ACB కోర్టు న్యాయమూర్తి ఇంటి వద్ద హాజరుపరచగా, 14 రోజుల రిమాండ్ విధించారు. అనంతరం చంచలగూడా జైలుకు తరలించారు.

ACB దర్యాప్తులో భీమరెడ్డి బెనామీలుగా హోమ్గార్డులు, డ్రైవర్లు, వాచ్మెన్లు ఉన్నట్లు గుర్తించారు. అతని డైరీలో 15 నుంచి 20 మంది బెనామీల వివరాలు ఉన్నాయి. హైదరాబాద్‌లో బెనామీల పేరిట 6 ప్రాపర్టీలు, బిజినెస్ పార్టనర్ పేరిట 3 ప్రాపర్టీలు ఉన్నాయి. కర్ణాటకలో కొన్ని వ్యవసాయ భూములు బెనామీల పేరిట రిజిస్టరై ఉన్నాయి. రెండు రియల్ ఎస్టేట్ కంపెనీల్లో పెట్టుబడులు పెట్టినట్లు కూడా ACB గుర్తించింది.

1995 బ్యాచ్ SI గా పనిచేసిన నాటి నుంచి డీఎస్పీ స్థాయి వరకు భీమరెడ్డి వేతనాలను ACB పరిశీలిస్తోంది. ఇంత ప్రాపర్టీ ఎలా కొనుగోలు చేశారనే ప్రశ్నకు అతని నుంచి స్టేట్మెంట్ రికార్డు చేశారు. రిమాండ్ తర్వాత ACB కస్టడీ పిటిషన్ దాఖలు చేసే అవకాశం ఉంది. కస్టడీలోకి తీసుకుంటే భీమరెడ్డి ఆస్తులకు సంబంధించి మరిన్ని వివరాలు వెలుగులోకి వస్తాయని అధికారులు భావిస్తున్నారు.