విశాఖపట్నంలో గుడ్డు ధర ఒక్కసారిగా రూ.8కు పెరిగింది

విశాఖపట్నం రిటైల్ మార్కెట్లో గుడ్డు ధర రూ.8కు చేరుకుంది. రెండు వారాల క్రితం ఈ ధర రూ.6-6.50 మధ్య ఉండేది. ఇంత తక్కువ వ్యవధిలో ధరలు అంత వేగంగా పెరగడం ఇటీవలి కాలంలో ఇదే తొలిసారి.

పౌల్ట్రీ ఫీడ్ ధరలు పెరగడం ప్రధాన కారణం. ఇరాన్-ఇజ్రాయెల్ ఉద్రిక్తతల కారణంగా దాణ ఖర్చు భారీగా పెరిగింది. ప్రపంచవ్యాప్తంగా గుడ్లకు డిమాండ్ పెరగడం, ఎగుమతులు ఎక్కువవ్వడంతో స్థానిక సరఫరా తగ్గింది. పౌల్ట్రీ ఫారమ్స్ కూడా ఉత్పత్తిని తగ్గించాయి.

కోళ్ళ రైతులు మౌల్టింగ్ ప్రాసెస్ చేపడతారు. ఈ ప్రక్రియలో కోళ్ళు 15 రోజుల పాటు గుడ్లు పెట్టవు. దీంతో ఆ సమయంలో ఉత్పత్తి నిలిచిపోతుంది. అదే సమయంలో విశాఖలో ఉష్ణోగ్రతలు 43-44 డిగ్రీలకు చేరాయి. అధిక వేడితో కోళ్ళు మేత తినడం తగ్గించడంతో ఉత్పత్తి మరింత తగ్గింది.

రాబోయే రోజుల్లో గుడ్డు ధర రూ.10కు చేరే అవకాశం ఉందని మార్కెట్ వర్గాలు అంచనా వేస్తున్నాయి. వైద్యులు గుడ్డు తినాలని సూచిస్తుండటంతో రోజూ కొనుగోళ్లు కొనసాగుతున్నాయి. దీంతో ప్రస్తుత ధరలు వినియోగదారులకు భారంగా మారాయి.

ఉష్ణోగ్రతలు తగ్గితే ధరలు తగ్గే అవకాశముందని నిపుణులు చెబుతున్నారు.