ఎల్‌నినోతో ఉమ్మడి మెదక్‌లో కరువు: వరి సాగు 40% తగ్గించాలని అధికారుల సూచన

ఎల్‌నినో ప్రభావంతో ఉమ్మడి మెదక్ జిల్లా (సిద్దిపేట, మెదక్, సంగారెడ్డి)లో గత రెండు నెలలుగా వర్షాలు సరిగా కురియక కరువు పరిస్థితులు నెలకొన్నాయి. జలాశయాలు, భూగర్భ జలాలు అడుగంటాయి. సాగునీటి కాలువలకు నీరు లేక ఎండిపోయాయి.

సిద్దిపేట జిల్లాలో 26 మండలాల పరిధిలో మొత్తం 5.40 లక్షల ఎకరాల సాగు అంచనా వేశారు. వ్యవసాయ శాఖ అధికారులు వరి సాగును భారీగా తగ్గించి, ఆరుతడి పంటలపై దృష్టి పెట్టాలని రైతులను కోరారు. మెదక్ జిల్లాలో గత సీజన్‌లో 3.15 లక్షల ఎకరాల్లో వరి వేయగా, ఈసారి 40 శాతం మేర తగ్గించేలా అధికారులు చర్యలు తీసుకున్నారు.

సంగారెడ్డి జిల్లాలో ప్రధానంగా పత్తి, చెరుకు పండిస్తారు. రెండు నెలలుగా వర్షాలు లేక పత్తి మొక్కల ఎదుగుదల స్తంభించింది. బోర్లలో నీళ్లు తగ్గడంతో రైతులు ట్యాంకర్లతో నీరు సరఫరా చేస్తూ పంటలను కాపాడుకుంటున్నారు. నీటి కొరతతో చెరకు సాగు కూడా తీవ్రంగా ప్రభావితమైంది.

ఈ నేపథ్యంలో రైతులు నష్టపోకుండా ఉండేందుకు ఉద్యాన శాఖ, కృషి విజ్ఞాన కేంద్రాలు ప్రత్యామ్నాయ మార్గాలను సూచించాయి. కూరగాయలు, పప్పు దినుసులు, చిరుధాన్యాలు, నూనె పంటలు తక్కువ నీటితో సాగు చేయవచ్చునని తెలిపారు. తునికి కృషి విజ్ఞాన కేంద్రం శాస్త్రవేత్త శ్రీనివాస్ మాట్లాడుతూ, బెండ 35 రోజుల్లోనే కాతకు వస్తుందని, బంతి 60 రోజుల్లో పూలు ఇస్తుందన్నారు. దసరా, బతుకమ్మ పండుగలకు బంతి పూలకు మంచి డిమాండ్ ఉండడంతో మంచి ఆదాయం వచ్చే అవకాశం ఉందని వివరించారు. ఆయిల్ పామ్ సాగు, తేనెటీగ పెంపకాన్ని కూడా అధికారులు ప్రోత్సహిస్తున్నారు.

జూన్‌లో వర్షపాతం లేనందున నీటి వనరులు మరింత తగ్గే ప్రమాదం ఉందని అధికారులు హెచ్చరించారు. రైతులు యధావిధిగా వరి వేయకుండా, అధికారులు సూచించిన ప్రత్యామ్నాయ పంటలు, ఉద్యాన పంటల వైపు మళ్లాలని సూచించారు.