ఎల్‌నినో ప్రభావం తెలంగాణలో మార్చి వరకు కొనసాగుతుంది: ఇన్కాయిస్ నివేదిక

ఇన్కాయిస్, ఐఎమ్డి పూణే సంయుక్తంగా తెలంగాణ ప్రభుత్వానికి ఒక నివేదిక సమర్పించాయి. దీని ప్రకారం, ఎల్‌నినో ప్రభావం వచ్చే ఏడాది మార్చి వరకు రాష్ట్రంలో కొనసాగుతుంది.

ప్రస్తుత వర్షాకాలంలోనే రాష్ట్రంలో లోటు వర్షపాతం స్పష్టంగా కనిపిస్తోంది. అక్టోబర్-డిసెంబర్ నెలల్లో ఎల్‌నినో ప్రభావం తీవ్రంగా ఉంటుందని నివేదిక పేర్కొంది.

ఆగస్టు-సెప్టెంబర్ నెలల్లో గరిష్ట, కనిష్ట ఉష్ణోగ్రతలు సాధారణం కంటే పెరుగుతాయి. దీనివల్ల విద్యుత్ వినియోగం గరిష్ట స్థాయికి చేరుతుంది. సాగు, తాగునీటి కొరతతో పాటు బోర్లు ఎండిపోయే అవకాశం ఉంది. జల విద్యుత్ ఉత్పత్తి తగ్గుతుంది.

పంటల దిగుబడిపై ప్రతికూల ప్రభావంతో రైతులకు, కూలీలకు ఆదాయ నష్టం వాటిల్లుతుందని నివేదిక హెచ్చరించింది. చేపలు, రొయ్యల రంగాలపై ఆధారపడే వారి ఆదాయం కూడా తగ్గుతుందని ఇన్కాయిస్ అంచనా వేసింది.