బంజారాహిల్స్‌లో 1.29 కేజీల బంగారం చోరీ; సేల్స్ ఎగ్జిక్యూటివ్, సోదరుడు అరెస్టు

హైదరాబాద్‌లోని బంజారాహిల్స్ పరిధిలో గురుకృప ఎక్స్‌పోర్ట్స్ అనే జ్యువెలరీ తయారీ కంపెనీలో జులై 17న అర్ధరాత్రి 1.29 కేజీల బంగారు ఆభరణాలు చోరీకి గురయ్యాయి. జూబ్లీహిల్స్ టాస్క్‌ఫోర్స్, బంజారాహిల్స్ పోలీసులు సంయుక్తంగా దర్యాప్తు చేసి ఇద్దరు నిందితులను అరెస్టు చేసి, రూ.1.60 కోట్ల విలువైన బంగారాన్ని స్వాధీనం చేసుకున్నారు.

నిందితులు కర్ణాటకలోని బీదర్ జిల్లాకు చెందిన హరీష్, అతని సోదరుడు ఆకాష్. హరీష్ ఈ కంపెనీలో గత మూడేళ్లుగా సేల్స్ ఎగ్జిక్యూటివ్‌గా పనిచేస్తున్నాడు. ఆకాష్ హైటెక్ సిటీలో ఓ ఐటీ సంస్థలో ఆఫీస్ బాయ్‌గా పనిచేస్తున్నాడు. ఇల్లు నిర్మాణం, వివాహం ఖర్చులతో అప్పుల్లో ఉన్న హరీష్, సోదరుడితో కలిసి ఈ చోరీకి పథకం వేశాడు.

పోలీసుల కథనం ప్రకారం, జులై 16న చోరీకి ప్రయత్నించి విఫలమైన తర్వాత, 17న తెల్లవారుజామున కంపెనీ వెనుక భాగంలోని బాత్‌రూమ్ గ్రిల్ తొలగించి లోపలికి ప్రవేశించారు. సీసీటీవీ కెమెరాలను తప్పించుకునేందుకు కరెంట్ స్విచ్ ఆఫ్ చేశారు. లోపల ఉన్న బంగారు ఆభరణాలను దొంగిలించి, హరీష్ వాటిని ఆకాష్‌కు అప్పగించాడు. దొంగిలించిన బంగారాన్ని కరిగించి అమ్మాలని వారు ప్రణాళిక వేశారు.

సీసీటీవీ ఫుటేజ్, సాంకేతిక ఆధారాలతో నిందితులను గుర్తించిన పోలీసులు ఇద్దరినీ అరెస్టు చేశారు. కేసు దర్యాప్తులో మొత్తం బంగారం రికవరీ చేయగలిగామని, ఇలాంటి సంస్థల యజమానులు ఉద్యోగులను నియమించే ముందు వారి నేర చరిత్రను స్థానిక పోలీస్ స్టేషన్‌తో క్రాస్ వెరిఫై చేసుకోవాలని టాస్క్‌ఫోర్స్ డీసీపీ వైభవ్ గాయక్వాడ్ సూచించారు.