మొక్కజొన్న పంటను కత్తెర పురుగు ముప్పు: శాస్త్రవేత్త రామకృష్ణ బాబు సూచనలు

తెలుగు రాష్ట్రాల్లో ఖరీఫ్‌లో వర్షాధారంగా సాగు చేసిన మొక్కజొన్న పంటకు కత్తెర పురుగు (Fall Armyworm) ముప్పు పొంచి ఉందని శాస్త్రవేత్తలు హెచ్చరించారు. గత వారం కురిసిన వర్షాలతో పంట కోలుకున్నా, పురుగు దాడి ప్రమాదం ఉందని తెలిపారు.

వ్యవసాయ శాస్త్రవేత్త రామకృష్ణ బాబు మాట్లాడుతూ.. ఈ పురుగు ఆకులపై గుంపులుగా గుడ్లను పెడుతుందని, గుడ్ల సముదాయాన్ని గుర్తించి తొలగించడం తొలి దశ నివారణ అని చెప్పారు. గుడ్ల నుంచి వచ్చే లార్వాలు ఆకులను తినడంతో పాటు మొక్కజొన్న సుడుల్లోని లేత భాగాలను నాశనం చేస్తాయని వివరించారు.

ఈ పురుగు సుమారు 20 నుంచి 30 రోజుల జీవిత చక్రం కలిగి ఉంటుందని, ఒకే పొలంలో 3-4 సార్లు ఆశించే ప్రమాదం ఉందని హెచ్చరించారు. రైతులు ఎప్పటికప్పుడు పొలాన్ని పరిశీలిస్తూ యాజమాన్య చర్యలు చేపట్టాలని సూచించారు.

నివారణకు తొలి దశలో చిన్న లార్వాలు కనిపిస్తే ఫ్లూబెండమైడ్, క్లోరంట్రనిలిప్రోల్ లేదా ఎమమెక్టింగ్ బెంజోట్ వంటి పురుగుమందులు పిచికారి చేయాలని, అంతకు ముందు వేప ఆధారిత అజాడిరెక్టిన్ 1500 పీపీఎం ద్రావణాన్ని ఎకరాకు 1 లీటరు పిచికారి చేయడం మంచిదన్నారు. లార్వాలు పెద్దవైన అడ్వాన్స్డ్ దశలో విషపు ఎరలు (పాయిజన్ బెయిట్) తయారు చేసి సుడుల్లో వేయాలని చెప్పారు.

విషపు ఎర కోసం 10 కిలోల తవుడు, 2 కిలోల బెల్లం తీసుకుని, బెల్లాన్ని 2-3 లీటర్ల నీటిలో మరగించి, తవుడుతో కలిపి ఉండలు చేయాలి. ఎరలు వేసే ముందు ఒక గంట ముందు థైమిథాక్సామ్ మందును కలపాలని సూచించారు. కంకి రాకముందు సుడుల్లో పురుగుమందులు పిచికారి చేయడం కూడా సమర్థవంతమని వివరించారు.

పంట నిర్వహణలో భాగంగా అంతర్ కృషి, 30 కిలోల యూరియాతో పాటు 10-15 కిలోల పొటాష్ ఎరువులను వేయాలని శాస్త్రవేత్త రామకృష్ణ బాబు సూచించారు. ఈ చర్యలు పాటిస్తే మంచి దిగుబడి సాధించవచ్చని ఆయన పేర్కొన్నారు.