వర్షం కోసం అలంపూర్‌లో తుంగభద్ర నీటితో స్వామికి రైతుల ప్రత్యేక అభిషేకం

జోగులాంబ గద్వాల జిల్లా అలంపూర్‌లో రైతు సంఘం ఆధ్వర్యంలో వర్షం కురవాలని ప్రత్యేక పూజలు చేశారు.

అలంపూర్‌లోని ఐదవ శక్తిపీఠమైన జోగులాంబ బాలబ్రహ్మేశ్వర స్వామి ఆలయంలో ఈ కార్యక్రమం నిర్వహించారు. ఆలయ ఆవరణలో కొలువైన పాతాళేశ్వరునికి తుంగభద్ర నది నీటిని తెచ్చి అభిషేకం చేశారు.

ఎల్నినో ప్రభావంతో ఈసారి తీవ్ర వర్షాభావ పరిస్థితులు నెలకొన్నాయని రైతులు తెలిపారు. ఇప్పటికే వేసిన పత్తి, కందులు, మొక్కజొన్న, ఉల్లి వంటి పంటలు ఎండిపోతున్నాయని ఆవేదన వ్యక్తం చేశారు.

అలంపూర్‌లో ఆలయం నీటితో నిండితే వర్షం పడుతుందనే సంప్రదాయం ఉందని, ఆ నమ్మకంతోనే ఈ ప్రత్యేక అభిషేకం చేశామని రైతులు వివరించారు. వర్షాల కోసం రైతులందరూ కలిసి ఈ కార్యక్రమం చేపట్టారు.