సంగారెడ్డి జిల్లాలో పంట పొలాల మధ్య క్వారీలు: రైతుల ఆవేదన

సంగారెడ్డి జిల్లా పటాన్‌చెరు మండలం లగడారం గ్రామంలో రైతులు తమ పంట పొలాల మధ్య క్వారీలు ఏర్పాటు కావడంతో ఇబ్బందులు ఎదుర్కొంటున్నారు. పేలుళ్ల కారణంగా రాళ్లు పొలాల్లో పడుతున్నాయని, దుమ్ము వల్ల నీరు కలుషితమై పంట దిగుబడి తగ్గుతోందని రైతులు ఆవేదన వ్యక్తం చేశారు.

నాలుగు దశాబ్దాల క్రితం ప్రభుత్వం ఈ రైతులకు వ్యవసాయం కోసం భూమి పంపిణీ చేసింది. అప్పటి నుంచి రెండు పంటలు పండిస్తున్నారు. ఇటీవల ఆ భూమిలో కొన్ని క్వారీలు నెలకొల్పగా, మరిన్ని క్వారీల ఏర్పాటు కోసం రెవెన్యూ, మైనింగ్ అధికారులు సర్వే నిర్వహించినట్లు రైతులు తెలిపారు. తమకు ఎలాంటి నోటీసు ఇవ్వకుండానే సర్వే చేశారని వారు ఆరోపిస్తున్నారు.

కంకర క్రషర్ల వల్ల వాతావరణం, నీటి కాలుష్యంతోపాటు భూగర్భ జలాలు కూడా దెబ్బతింటున్నాయని రైతులు ఆందోళన చెందుతున్నారు. ఈ క్వారీల నిర్వహణ వల్ల 13 ఎకరాల పంట పొలాలు దెబ్బతింటున్నాయని, రాళ్లు పడడం వల్ల సాగు సాధ్యం కావడం లేదని చెబుతున్నారు.

ఉన్న కొద్ది భూమిని కోల్పోతే జీవనాధారం పోతుందని, ప్రత్యామ్నాయ ఉపాధి లేదని రైతులు ప్రభుత్వానికి విజ్ఞప్తి చేశారు. క్వారీలను తొలగించాలని కోరుతున్నారు. ఈ విషయంపై జిల్లా అధికారుల స్పందన తెలియాల్సి ఉంది.