నంద్యాలలో మంత్రి ఫారుక్ స్నేహితుడి స్థలంపై కబ్జా యత్నం; పోలీసులకు ఫిర్యాదు, కేసు నమోదు

నంద్యాలలో ఓ స్థలం వివాదం రేపింది. నగరంలోని SBI కాలనీలో సింగ్ అపార్ట్‌మెంట్ సమీపంలో డాక్టర్ సత్యనారాయణకు 12 సెంట్ల భూమి ఉంది. ఈ స్థలాన్ని ఆయన 30 ఏళ్ల కిందట కొనుగోలు చేశారు. ఇటీవల కొందరు గుర్తు తెలియని వ్యక్తులు వచ్చి ఈ స్థలంలో 2.5 సెంట్లు తమదంటూ హక్కు చెప్పుకున్నారు. ఆధారాలు చూపకుండా స్థలం చుట్టూ ఉన్న ఫెన్సింగ్ తొలగించి ప్రహరీ గోడను కూల్చివేశారు.

స్థల యజమాని డాక్టర్ సత్యనారాయణ టూ టౌన్ పోలీస్‌ స్టేషన్‌లో ఫిర్యాదు చేశారు. తన వద్ద పూర్తి ఆధారాలు ఉన్నాయని చెప్పారు. మంత్రి ఎన్.ఎం.డి. ఫారుక్ ఈ ఘటనపై స్పందించి, నిందితులపై వెంటనే చర్యలు తీసుకోవాలని పోలీసులను ఆదేశించారు. డాక్టర్ సత్యనారాయణ మంత్రి ఫారుక్‌కు సన్నిహితుడని తెలిసింది.

పోలీసులు నిందితులపై కేసు నమోదు చేశారు. నిందితులు తమ వాదనకు ఆధారాలు చూపాలని పోలీస్‌స్టేషన్‌కు రావాలని సమన్లు జారీ చేశారు. అయితే నిందితులు ఆధారాలు సమర్పించకుండా పరారీలో ఉన్నారు. వారి కోసం పోలీసులు గాలిస్తున్నారు.

స్థానికులు ఈ ఘటనపై ఆందోళన వ్యక్తం చేస్తున్నారు. మంత్రి సన్నిహితుడి స్థలమే ఇలా కబ్జాకు గురైతే సామాన్యుల పరిస్థితి ఏమిటని వాదిస్తున్నారు.