పాట్నాలో ఖాన్ సర్ కోచింగ్ సెంటర్ వద్ద కాల్పులు, సెక్యూరిటీ గార్డుకు తీవ్ర గాయాలు

బిహార్‌లోని పాట్నాలో గురువారం అర్ధరాత్రి విద్యావేత్త ఖాన్ సర్ కోచింగ్ ఇన్‌స్టిట్యూట్ సమీపంలో జరిగిన కాల్పుల ఘటనలో ఒక సెక్యూరిటీ గార్డు తీవ్రంగా గాయపడ్డాడు. గార్డును వెంటనే ఆసుపత్రికి తరలించారు. సమాచారం అందుకున్న ఖాన్ సర్ వెంటనే ఘటనా స్థలానికి చేరుకున్నారు. తన కార్యాలయంపై దాడి చేసి విధ్వంసం సృష్టించారని, కాల్పులు జరిపారని ఆయన తెలిపారు. ఘటనలో పాల్గొన్న వ్యక్తులను సీసీటీవీ ఫుటేజీ ఆధారంగా గార్డు గుర్తించాడు. ఆ దృశ్యాలను పోలీసులకు అప్పగించారు. రోషన్ కుమార్ అనే యువకుడు కాల్పులకు పాల్పడినట్లు అనుమానిస్తున్నారు.

ఖాన్ సర్ మాట్లాడుతూ, ఇటీవల తన విద్యార్థులు వేలాది మంది బిహార్ పోలీసు రిక్రూట్‌మెంట్ పరీక్షల్లో విజయం సాధించారని, అతి తక్కువ ఫీజుతో విద్యను అందించడమే తనపై ప్రత్యర్థి కోచింగ్ సంస్థల కోపానికి కారణమని ఆరోపించారు. ఈ ఘటన వెనుక వారే ఉన్నారని అనుమానం వ్యక్తం చేశారు. గార్డు గుర్తించిన దాడిదారుల వివరాలను పోలీసులు సేకరించి దర్యాప్తు ప్రారంభించారు. బిహార్‌లో కోచింగ్ సంస్థల మధ్య పోటీ, గొడవలు సర్వసాధారణమని స్థానికులు చెబుతున్నారు. ఈ ఘటనతో విద్యార్థుల్లో ఆందోళన నెలకొంది. పోలీసులు నిందితులను పట్టుకునేందుకు ప్రయత్నాలు ముమ్మరం చేశారు. గాయపడిన గార్డు ఆరోగ్యం నిలకడగా ఉన్నట్లు ఆసుపత్రి వర్గాలు తెలిపాయి.