అరుణాచల్‌ప్రదేశ్‌లో ఆకస్మిక వరద: రెండు ఇళ్లు ధ్వంసం, కుటుంబం రోడ్డున పడింది

అరుణాచల్ ప్రదేశ్‌లో భారీ వర్షాల కారణంగా ఆకస్మిక వరద సంభవించి రెండు ఇళ్లు పూర్తిగా ధ్వంసమయ్యాయి. ఈ ఘటనలో ఓ కుటుంబం తమ ఆస్తిపాస్తులన్నీ కోల్పోయి రోడ్డున పడింది. బాధితురాలు మాట్లాడుతూ, తమ ఇల్లు, ఒక స్కూటీ, రూ.1 లక్ష రుణంతో కొనుగోలు చేసిన స్థలమంతా వరదకు కొట్టుకుపోయిందని ఆవేదన వ్యక్తం చేశారు. 'మాకు సాయం చేయండి. ప్రభుత్వం మాపై దయ చూపించి స్థలం ఇప్పించాలి. లేదంటే నా పిల్లల్ని ఎక్కడ ఉంచాలో తెలియడం లేదు' అని ఆమె కన్నీళ్లు పెట్టుకున్నారు. ప్రస్తుతం ఆ కుటుంబం ఆశ్రయం లేకుండా రోడ్డుపై ఉండాల్సిన పరిస్థితి నెలకొంది. గత కొద్ది రోజులుగా అరుణాచల్ ప్రదేశ్‌లో భారీ వర్షాలు కురుస్తుండడంతో పలు ప్రాంతాల్లో వరదలు, కొండచరియలు విరిగిపడుతున్నాయి. ఇటీవలి వరదలతో జనజీవనం స్థంభించింది. బాధిత కుటుంబం ప్రభుత్వం నుంచి సహాయం కోసం ఎదురుచూస్తోంది.