తెలంగాణలో మూడు రోజులు భారీ వర్షాలు, ఆసిఫాబాద్‌, కామారెడ్డి, మెదక్‌కు రెడ్ అలర్ట్

తెలంగాణలో రాబోయే మూడు రోజుల పాటు భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది. బంగాళాఖాతంలో ఏర్పడిన అల్పపీడనం, దాని అనుబంధ ఉపరితల ద్రోణి ప్రభావంతో ఈ వర్షాలు కురుస్తాయని అధికారులు తెలిపారు.

కొమరంభీం ఆసిఫాబాద్, కామారెడ్డి, మెదక్ జిల్లాలకు ఆగస్టు 10న రెడ్ అలర్ట్ జారీ చేశారు. ఈ జిల్లాల్లో అతి భారీ నుంచి అత్యంత భారీ వర్షాలు పడతాయని హెచ్చరించారు. అనేక ఇతర జిల్లాల్లో విస్తారంగా వర్షాలు కురిసే అవకాశం ఉంది.

కొన్ని చోట్ల ఉరుములు, మెరుపులతో పాటు ఈదురుగాలులు వీస్తాయని వాతావరణ శాఖ సూచించింది. గంటకు 30 నుంచి 40 కిలోమీటర్ల వేగంతో ఈదురుగాలులు వీస్తే, మరికొన్ని జిల్లాల్లో గంటకు 40-50 కిలోమీటర్ల వేగంతో గాలులు వీస్తాయని అధికారులు తెలిపారు. రాజధాని హైదరాబాద్‌లో కూడా భారీ వర్షాలు నమోదయ్యే అవకాశం ఉంది.

ఆగస్టు 12 తర్వాత వర్షాల తీవ్రత తగ్గుతుందని, ప్రస్తుతానికి పెద్దగా ప్రమాదకర హెచ్చరికలు లేవని భారత వాతావరణ శాఖ వివరించింది.