ఏపీ, తెలంగాణలో భారీ వర్ష సూచన; బంగాళాఖాతంలో మరో అల్పపీడనం

బంగాళాఖాతంలో మరో అల్పపీడనం ఏర్పడే అవకాశం ఉన్నట్లు వాతావరణ శాఖ తెలిపింది. దీని ప్రభావంతో ఆంధ్రప్రదేశ్, తెలంగాణలో రాబోయే వారం రోజులపాటు వర్షాలు కొనసాగుతాయని హెచ్చరించింది.

ఇప్పటికే పలు ప్రాంతాల్లో వర్షాలు కురుస్తున్నాయి. అల్పపీడనం ప్రభావంతో రెండు రాష్ట్రాల్లోని పలు జిల్లాల్లో తేలికపాటి నుంచి మోస్తారు వర్షాలు, అక్కడక్కడ భారీ వర్షాలు కురిసే అవకాశం ఉంది. వర్షం సమయంలో గంటకు 40-50 కిలోమీటర్ల వేగంతో ఈదురుగాలులు వీచనున్నాయి. ఉరుములు, మెరుపులతో కూడిన వర్షాలు కూడా పడవచ్చు.

భారీ వర్షాల నేపథ్యంలో వాగులు, కాలవలు పొంగిపొర్లే ప్రమాదం ఉంది. ప్రజలు అప్రమత్తంగా ఉండాలని, పిడుగులు పడే సమయంలో చెట్ల కిందకు చేరకూడదని అధికారులు సూచించారు. మత్స్యకారులు సముద్రంలోకి వెళ్లొద్దని మత్స్యశాఖ హెచ్చరించింది. రైతులు సైతం తగిన జాగ్రత్తలు తీసుకోవాలని వాతావరణ శాఖ విజ్ఞప్తి చేసింది.

ఉమ్మడి తూర్పు గోదావరి జిల్లాలోని లోతట్టు (లంక) ప్రాంతాల్లో వర్షాలతో వాగులు పొంగిపొర్లాయి. పంట పొలాలు నీట మునగడంతో స్థానిక రైతులు ఆవేదన వ్యక్తం చేస్తున్నారు. అధికారులు, ప్రజాప్రతినిధులు స్పందించి సహాయం అందించాలని కోరుతున్నారు.