జమ్మూ కాశ్మీర్‌లోని రాజౌరీ జిల్లాలో వరద బీభత్సం; ధర్హాల్ నది పొంగి 400 వాహనాలు కొట్టుకుపోయాయి

జమ్మూ కాశ్మీర్ లోని రాజౌరీ జిల్లాలో భారీ వర్షాల కారణంగా ధర్హాల్ నది ప్రమాదకర స్థాయిని దాటి ప్రవహించడంతో లోతట్టు ప్రాంతాలు మునిగిపోయాయి. ఈ వరదల్లో వందల సంఖ్యలో వాహనాలు నీటిలో కొట్టుకుపోయాయి. రాజౌరీ బస్టాండ్ పూర్తిగా నీట మునిగింది. స్థానికుల అంచనాల ప్రకారం 200 నుంచి 400 వాహనాలు కొట్టుకుపోయాయి. ఒక మహిళ గల్లంతైనట్లు సమాచారం. జిల్లా యంత్రాంగం వరద హెచ్చరిక జారీ చేసి, ప్రజలను సురక్షిత ప్రాంతాలకు వెళ్లాలని, లోతట్టు ప్రాంతాల్లోకి వెళ్లొద్దని సూచించింది. భారీ వర్షాలు ఇంకా కొనసాగుతుండటంతో పరిస్థితి మరింత దిగజారింది. రాజౌరీతో పాటు పూంచ్ జిల్లాలోని సురన్‌కోట్ ప్రాంతంలోనూ వరదలు సంభవించాయి. రోడ్లు దెబ్బతినడంతో పలు ప్రాంతాలకు రాకపోకలు నిలిచిపోయాయి. ముఖ్యమంత్రి ఒమర్ అబ్దుల్లా ఢిల్లీలో ఉన్నప్పటికీ, పరిస్థితిని నిరంతరం సమీక్షిస్తున్నారు. 'ప్రాణాలు కాపాడటమే ప్రభుత్వ ప్రాధాన్యత' అని ఆయన సోషల్ మీడియాలో పేర్కొన్నారు. రెస్క్యూ చర్యల్లో సైన్యం సైతం పాల్గొంటోంది. వరద బాధితులకు ప్రభుత్వం సహాయం అందిస్తామని హామీ ఇచ్చింది. ప్రజలు సహాయం కోసం ఎదురుచూస్తుండగా, అధికారులు రెస్క్యూ ఆపరేషన్ ముమ్మరం చేశారు.