FMCG ధరలు పెరగనున్న నేపథ్యంలో షింక్‌ఫ్లేషన్ వైపు కంపెనీలు

FMCG కంపెనీలు షాంపూ, సబ్బులు, బిస్కెట్లు వంటి నిత్యావసర వస్తువుల ధరలు పెంచే యోచనలో ఉన్నాయి. ముడిసరుకు ధరలు పెరగడం, అంతర్జాతీయ సరఫరా అంతరాయాల కారణంగా పలు కంపెనీలు షింక్‌ఫ్లేషన్ మార్గాన్ని ఎంచుకుంటున్నాయి.

ప్రపంచవ్యాప్తంగా ముడి పదార్థాల ధరలు, లాజిస్టిక్స్ చార్జీలు పెరగడంతో ఈ పరిస్థితి ఏర్పడింది. జూన్ త్రైమాసికంలోనే చాలా FMCG కంపెనీలు 2-5% ధరలు పెంచినప్పటికీ అది సరిపోలేదని, మరోసారి ధరల సమీక్ష అనివార్యమైందని కంపెనీలు స్పష్టం చేస్తున్నాయి.

బిస్కెట్ తయారీ సంస్థ బ్రిటానియా ప్రస్తుత త్రైమాసికంలో తమ ఉత్పత్తుల ధరలపై 1.5-2% ప్రభావం ఉంటుందని, ముఖ్యంగా ₹10 బిస్కెట్ ప్యాకెట్ల పరిమాణం తగ్గిస్తామని ప్రకటించింది. అంతర్జాతీయంగా పంచదార, పామాయిల్ ధరలు పెరగడమే ఇందుకు కారణం. హిందుస్థాన్ యూనిలీవర్ (HUL) 2-5% ధరల పెంపు ఉంటుందని సంకేతాలు ఇచ్చింది. డాబర్, గోద్రేజ్ కన్స్యూమర్, టాటా కన్స్యూమర్ ప్రొడక్ట్స్ సైతం ముడి వ్యయం తగ్గకపోతే ధరలు పెంచక తప్పదని తెలిపాయి.

మరోవైపు ప్రీమియం మద్యం అమ్మకాలు ఊహించని స్థాయిలో పెరిగాయి. రాడికో కైతాన్ ప్రీమియం పోర్ట్ఫోలియో అమ్మకాలు 35.8% వృద్ధి చెందగా, కంపెనీ నికర లాభం 76% పెరిగింది. యునైటెడ్ స్పిరిట్స్ నికర లాభం 51.6% పెరిగింది. సాధారణ ధరల మద్యం అమ్మకాలు మాత్రం గణనీయంగా తగ్గాయి. ధరల ఒత్తిడి మధ్య ప్రీమియం మద్యానికి డిమాండ్ పెరగడం ఆర్థిక విశ్లేషకులను ఆకర్షించింది.