హైటెక్స్లో ‘ఫుడ్ ఏ ఫెయిర్ 2026’ ప్రారంభం
హైదరాబాద్ మాదాపూర్ హైటెక్స్లో ‘ఫుడ్ ఏ ఫెయిర్ 2026’ ప్రదర్శన ప్రారంభమైంది. నేషనల్ బ్యాడ్మింటన్ కోచ్ పుల్లెల గోపీచంద్ ఈ ప్రదర్శనను ప్రారంభించారు.
చెఫ్స్ అసోసియేషన్ ఆఫ్ తెలంగాణ, ఆంధ్రప్రదేశ్, బ్లిచ్ ఎగ్జిబిషన్ సంస్థ సంయుక్తంగా ఈ ఈవెంట్ నిర్వహిస్తున్నాయి. ఫుడ్ ఇండస్ట్రీ స్టార్టప్లు, ఔత్సాహిక వ్యాపారవేత్తలు కలిసి 150కి పైగా స్టాల్స్ ఏర్పాటు చేశారు.
రామోజీ గ్రూప్కు చెందిన ప్రియా ఫుడ్స్ ‘సబల’ మిలెట్ స్టాల్ ప్రత్యేక ఆకర్షణగా నిలిచింది. రెండు నిమిషాల్లో తయారయ్యే కిచిడీలు, ఉప్మాలు, మిలెట్ నూడిల్స్, కుకీస్, ప్రోటీన్ బార్లను అక్కడ ప్రదర్శించారు. పాల పదార్థాలు, కేకులు, బిస్కెట్లు, చాక్లెట్లు, ఇడ్లీలు, సమోసాలు, నూడిల్స్, లడ్డూలు వంటివి సందర్శకులను ఆకట్టుకున్నాయి.
తెలుగు రాష్ట్రాల హోటల్ మేనేజ్మెంట్ కాలేజీల విద్యార్థులకు వంటల పోటీలు నిర్వహించారు. బిర్యానీ, హలీం, రాగి సంకటి, కోడి కూర, స్టఫ్ గుత్తి వంకాయ వంటి వంటకాలు చేసి చూపించారు. 20 కాలేజీల విద్యార్థులు పాల్గొనగా, 20 మంది హోటల్ షెఫ్లు న్యాయనిర్ణేతలుగా వ్యవహరించారు.
ఫ్రోజన్ ఫుడ్స్ విభాగంలో మోమోలు, చికెన్ నగెట్స్, కబాబ్లు, చేపలు, రొయ్యలు, రెడీ టు ఈట్ పరాటాలు, సమోసాలు, పిజ్జాలు, ఐస్క్రీమ్లు ప్రదర్శించారు. మిలెట్ ఆధారిత కోర్సులు, ఎగుమతి విధానాలు, మహిళా పారిశ్రామికవేత్తలకు మద్దతు వంటి అంశాలపై స్టాల్స్ ఏర్పాటు చేశారు. శనివారంతో ఈ ప్రదర్శన ముగుస్తుంది.
వార్త ఆధారాలు: పబ్లిక్ న్యూస్ బ్రాడ్కాస్ట్లు, అధికారిక అప్డేట్లు, ఉషా కిరణం ఎడిటోరియల్ ప్రమాణాలు.
సవరణల కోసం సంప్రదించండి: help@ushakiranam.com
