పిల్లలలో ఫారెన్ బాడీ ఆస్పిరేషన్: కారణాలు, లక్షణాలు, నివారణ చర్యలు

చిన్నపిల్లలు నోట్లో వస్తువులు పెట్టుకోవడంతో అవి శ్వాసనాళంలో ఇరుక్కునే ప్రమాదం ఉంటుంది. దీన్నే ఫారెన్ బాడీ ఆస్పిరేషన్ అంటారు.

అంకుర హాస్పిటల్స్‌కు చెందిన డాక్టర్ శ్రీనివాస జక్క వివరించిన విధంగా, సాధారణంగా 1 నుంచి 3 సంవత్సరాల మధ్య పిల్లల్లో ఈ సమస్య ఎక్కువగా కనిపిస్తుంది. ఈ వయసులో పిల్లలు నోటిద్వారా అన్వేషించడం, వారి మింగే సామర్థ్యం ఇంకా పూర్తి స్థాయిలో అభివృద్ధి చెందకపోవడం వల్ల ఈ ప్రమాదం జరుగుతుంది.

ముఖ్యంగా వేరుశెనగ, జీడిపప్పు, సీతాఫలం గింజలు, సపోటా గింజలు వంటి ఆహార పదార్ధాలు, బొమ్మల చిన్న భాగాలు, బెలూన్లు, కాయిన్స్, బటన్ బ్యాటరీలు లాంటి వస్తువులు శ్వాసనాళంలో ఇరుక్కుంటాయి. ముఖ్యంగా బటన్ బ్యాటరీలు విద్యుత్ డిశ్చార్జ్ వల్ల చుట్టుపక్కల కణజాలాన్ని దెబ్బతీస్తాయి.

ఫారెన్ బాడీ ఆస్పిరేషన్ జరిగినప్పుడు పిల్లలు ఒక్కసారిగా విపరీతంగా దగ్గడం, ఊపిరి తీసుకోవడానికి ఇబ్బంది పడడం, రంగు మారడం వంటి లక్షణాలు కనిపిస్తాయి. కొన్నిసార్లు ఈ లక్షణాలు కొద్ది రోజులు తగ్గినట్లు అనిపించినా, ఆ తర్వాత న్యుమోనియా వంటి సమస్యలు రావచ్చు.

ఫారెన్ బాడీని గుర్తించడానికి బ్రాంకోస్కోపీ ప్రక్రియ అత్యంత ఖచ్చితమైనది. ఇది మత్తు ఇచ్చి చేసే సురక్షితమైన పద్ధతి. ముందుగా గుర్తించి తీస్తే సులువుగా బయటకు తీయవచ్చు. ఆలస్యమైతే వస్తువులు వాచి, చిదిగిపోయి, ఊపిరితిత్తులకు నష్టం కలిగించొచ్చు.

తల్లిదండ్రులు 4 సంవత్సరాలలోపు పిల్లలకు వేరుశెనగ, గింజలు వంటి వాటిని ముక్కలుగా కాకుండా పేస్ట్ లేదా పొడి రూపంలో ఇవ్వాలి. చిన్న వస్తువులు, బటన్ బ్యాటరీలు అందుబాటులో ఉండకుండా చూసుకోవాలి. పిల్లలు నోట్లో ఆహారం ఉంచుకుని ఆడటం, పరుగెత్తడం నివారించాలి. ఫారెన్ బాడీ సంశయం వస్తే వెంటనే అనుభవజ్ఞులైన వైద్యులను సంప్రదించాలి.