సికింద్రాబాద్ కంటోన్మెంట్‌లో రేవంత్ రెడ్డి 57వ పుట్టినరోజు వేడుకలు

తెలంగాణ ముఖ్యమంత్రి రేవంత్ రెడ్డి 57వ పుట్టినరోజు సందర్భంగా సికింద్రాబాద్ కంటోన్మెంట్‌కు చెందిన మహిళలు వేడుకలు నిర్వహించారు. హైదరాబాద్ జూబ్లీ బస్ స్టేషన్‌లో వారు 57 కిలోల కేక్ కట్ చేశారు.

మహిళలు సీఎం రేవంత్ రెడ్డి ముఖచిత్రం ఉన్న మాస్కులు ధరించి వేడుకలో పాల్గొన్నారు. ఆర్టీసీ బస్సుల ముందు నిలబడి ఆయనకు శుభాకాంక్షలు తెలిపారు. ఈ కార్యక్రమానికి పెద్ద సంఖ్యలో మహిళలు హాజరయ్యారు.

మహాలక్ష్మి పథకం గురించి కూడా మహిళలు మాట్లాడారు. ముఖ్యమంత్రిగా ప్రమాణం చేసిన రోజే ఆర్టీసీ బస్సుల్లో మహిళలకు ఉచిత ప్రయాణం కల్పించిన ఘనత రేవంత్ రెడ్డికి దక్కుతుందని వారు చెప్పారు. ఈ పథకంతో ప్రతిరోజూ లక్షలాది మంది మహిళలు ఉచిత ప్రయాణం చేస్తున్నారని వారు పేర్కొన్నారు.

పథకాలన్నీ మహిళల పేరిటే తెచ్చారని, అందుకు కృతజ్ఞతలు చెప్పుకుంటున్నామని ఓ మహిళ తెలిపారు. మహిళలు మాస్కులు ధరించి వినూత్నంగా శుభాకాంక్షలు తెలపడం కార్యక్రమానికి ప్రత్యేక ఆకర్షణగా నిలిచింది.